پاکستان میں دہشت گردوں کا کوئی ٹھکانہ نہیں، وزیر خارجہ

وزیر خارجہ شاہ محمود قریشی نے کہا ہے کہ پاکستان میں دہشت گردوں کا کوئی ٹھکانہ نہیں۔

تفصیلات کے مطابق وزیر خارجہ شاہ محمود قریشی نے ہائی کمشنر کے عشائیہ سے خطاب کرتے ہوئے کہا کہ ریڈ لسٹ سے نکالنے میں پاکستان نژاد اراکین پارلیمنٹ کی کاوشوں پر ان کا مشکور ہوں، ریڈ لسٹ کا معاملہ پاکستان اور برطانیہ کے دوستانہ تعلقات پر اثرانداز ہورہا تھا۔

  وزیر خارجہ نے کہا کہ مغربی میڈیا پاکستان کو افغانستان کے معاملے میں ملوث کرنے کی کوشش کررہا تھا جبکہ افغانستان کی صورت حال کے ذمہ دار سابق حکمران ہیں۔

شاہ محمود قریشی نے یہ بھی کہا کہ افغانستان کے عوام جنگ سے تھک چکے ہیں، افغان عوام صرف امن اور استحکام چاہتے ہیں۔

وزیر خارجہ کا کہنا تھا کہ مغربی ممالک اب پاکستان کو قربانی کا بکرا بنانا چاہتے ہیں لیکن پاکستان میں دہشت گردوں کا کوئی ٹھکانہ نہیں، مغربی میڈیا چاہے تو آکر دیکھ لے۔

شاہ محمود قریشی کا یہ بھی کہنا تھا کہ برطانیہ افغانستان میں نمائندہ حکومت کا حامی ہے، پاکستان بھی یہ ہی چاہتا ہے۔ ہمارے اہداف ایک ہیں اپروچ مختلف ہوسکتی ہے۔

وزیر خارجہ شاہ محمود قریشی کا مزید کہنا تھا کہ برطانیہ طالبان سے رابطہ کرے، وہاں انسانی المیہ جنم لینے کو ہے، افغانستان سے نکلنے والے یورپ کا رخ کرینگے جبکہ پاکستان امدادی سرگرمیوں کا مرکز بننے کیلئے تیار ہے، افغان عوام کی مدد کیلئے تعاون کرینگے۔

واضح رہےکہ  برطانیہ کے تین روزہ دورے پر لندن پہنچنے پر برطانیہ میں پاکستان کے ہائی کمشنر معظم احمد خان، نائب سفیر ڈاکٹر فیصل عزیز اور سفارتخانے کے سینئر افسران نے وزیر خارجہ مخدوم شاہ محمود قریشی کا خیر مقدم کیا تھا۔

شاہ محمود قریشی برطانوی فارن افیرز کمیٹی کے سربراہ، برطانوی وزیر خارجہ الزبتھ ٹورس اور ممبران پارلیمنٹ سے بھی ملاقات کریں گے۔

ملاقات میں دو طرفہ تعلقات، کثیرالجہتی شعبہ جات میں دو طرفہ تعاون اور اہم علاقائی و عالمی امور پر تبادلہ خیال کیا جائے گا۔

The post پاکستان میں دہشت گردوں کا کوئی ٹھکانہ نہیں، وزیر خارجہ appeared first on .