جوڑوک میتاران

اوا پیپیلی، توجماعتی، ہیس ن لیگی، ہسے ق لیگ، اَف دُورو میکی جمیعت والا، وارزو دُورو لال نیشنلی۔غیچ نیشئیشینی، عقل بستہ بیتی  شیر۔ مہ دلیل مہ بچین حجت، خور کوس دلیل اوچے رایو مہ بچین ہِش کیہ اہمیت نِکی۔ ای کوروم مہ بچین جائز، مہ سوم جواز ٹیپ مگم ہے کورمو تو کی ارو بالکل ناجائز، کوریکوکی ہےکورمو تو کوسان۔ قومیت، علاقہ پرستی، پارٹی بازی، عصبیت، مسلکی وا مذہبی تعصب تان مفادا کی توریتائے ہمیت اسپہ جم ہتھیار مگم ہے قومی تعصب، مسلک پرستی، علاقہ پرستی خورو مفادا کی اوشوئے تان لوڑے وا۔ قرآن شریف، ملکی قانون ،انسانی حقوقو کتاب سف تہ پروشٹہ بیلنجین بونی کی ہیہ کوروم غلط ہمو نوکوریلیک۔ مطلب "میٹھا میٹھا ہپ ہپ  کڑوا کڑوا تھو تھو۔”

اسپہ ݯھتراری سف مہترانان نسل، کوس بپ بدخشانہ تختہ نیشی اسور، کوس بپ کابلو مئیر ،کوس بپو جاگیر تہرانہ شیر، کوس بپو سائبیریا  وا  کا ثمرقندو بخارو والیان۔ تتین سارئیر کی اسپہ کورا ݯھترارتو جو بسوتین کوساؤ گیتی اسوسی، اسپہ بپ گینیان کوڑ ہائی پونہ راہا نو ݯھوری شینی لہ۔ ہموݰ سوچو وا نسلو رویان راہان پیسہ دیتی ترکولان نیزیک پھاروشار، ہمیتان تان ݯاکئے ہمیتان دُوران اولیلیک۔ ویسے مہ بپ دی کوکیہ ژاغو میتار بوئے ہتو بشارو کوریلیک، وا اوا  اچی غیستی کھیوت بومان۔ بہچیتائے ݯھترارو راہان لُو، ہیت  ساؤز ہونی یانو ہونی اسپہ سورا کیہ فرق پاریران۔ رشٹو موڑتوبی، چار سوری دیتی یا موٹر ٹھور بیتی  بریک اسپہ بچین کیہ نوژان نو، ہیت سف اسپہ ثقافتو حصہ۔ اسپہ راہان بچین لُو دیتی تان ثقافتوتین نقصان تارئیکو  کیاوت دی کوششو  نوکوروسی۔

اگر آپ کھوار پڑھ نہیں سکتے تو کھوار سنیں۔ ویژویل آڈیو کو پلے کریں