ہنون جولائی مسو بیشیر نیوف تاریخہ، جوش محرم الحرامو آنوس ݯھترارو ٹاؤن ہالہ آنجمن ترقئ کھوار حلقہ ݯھترارو ویشکیار ای محفل مسالمہ منعقد کورونو ہوئے۔
ݯھترارو نیوکو وا الگ لہجو شاعر محترم پرنسپل ثناء اللہ ثانی صاحب بابرکت محفل مسالمو، تلاوت کلام مجیدو سورا آغاز کوری څِق دی بابرکت آریر ۔
انجمن ترقئ کھوار حلقہ ݯھترارو سرپرست اعلی محترم استاذ افضل اللہ افضل صاحب محفلو صدارتو کوراؤ اوشوئے وا خاص مینؤو حیثیتہ استاذ محترم صالح ولی آزاد صاحب تشریف لاکھی استائے۔
میئر ݯھترارو صدر فرید احمد رضا صاحب وا کھوارو شیئلی شاعر وا نثر نگار فرہاد یوسفی صاحب دی سٹیجہ نیشی اسیتانی۔
محفلو نظامتو حلقہ ݯھترارو صدر معیزالدین بہرام صاحب کوراؤ اوشوئے۔ حلقہ ݯھترارو سنیئر نائب صدر شیر بڑانگ خان گداز صاحب حمد باری تعالیٰ وا حلقو سکتار آنصار نعمانی صاحب نعت شریف پیش ارینی۔ شعرائے اکرام معیزالدین بہرام ، انصار نعمانی، ثناءاللہ ثانی، انجمنو مرکزی لوٹ سکتار پروفیسر ظہور الحق دانش، حفیظ اللہ امین، فرہاد یوسفی، شیربڑانگ خان گداز، صالح ولی آزاد وا افضل اللہ، صاحبان کربلو واقعو سورا، موجودہ دورا حسینیت اوچے یذیدیتو ہوش کوری زندگی شخسیئکو سورا، وا خاص کوری سردار شُہداء وا کربلو شُہیدانن شانہ سلام اوچے عقیدتو شکلہ تان شیئیلی وا ژان پولوئیکو کلامان پیش ارینی۔
آخرا مئیر ݯھترارو صدر فرید احمد رضا صاحب، فرہاد یوسفی صاحب، مہمان خصوصی جناب صالح ولی آزاد صاحب وا صدر محفل جناب افضل اللہ افضل صاحب تان تان زرین خیالاتن ساری شُراکان مستفید آرینی۔ آخرہ ایغو گانی بیری گازا فوٹوگرافیار آچی محفل پروزیتائے۔
آنصار نعمانی،
لوٹ سکتار حلقہ چھترار۔
۲۹/۷/۲۰۲۳
