شوم عادت – کھوار اداریہ

حقیقت یا افسانہ۔ سرحدو ای ڈرائیور برار کوغذیو روئے موٹرو راہو کاسینیان خبر بیکو کوسوم دیتی بلاہار ݯھونین بوئے رے گاڑی کاسیکو پیڅھیرو بیرائے۔
مطلب ہیہ کہ اسپہ رویان بو شوم عادت شیر کہ اسپہ راہا پھار نیسیکو بچین چوکوتین گوسی۔ حالانکہ جو قدم توری یا موڑی قدم لکھی آرامہ ای وݰکیاری راہا(سنگل روڈا) بی پھار نیسین بوئے۔ مگم موش چوکہ گیتی چھور وݰکی گاڑیان موژو اف راہی کوئے،بلکہ مرزائی کوئے کہ ریتام دی کیہ غلط نوبوئے۔ ہیہ لو حقیقت کی پیدل کوساکان خیالو لاکھیلیک۔ مگم ہیہ ہے پیدل کوساکو تان دی ذمہ داری کہ ہیس تان حفاظتو بچین دی تان دونیر۔

پیدل کوساکان مرزائی تان ژاغہ۔ مگم گاڑی کاسیاکان تان دی ای نخرہ شیر۔گاڑیو راہو موژا روپھئے ٹریفیک والو سوم مشقولگی کونی۔ موٹرو راہو موژا روپھئے مخالف سمتہ گیاک ای ڈرائیور ملگیرو سوم سیاسی بحث کونی۔ہموݰ کوروم ٹریفکو اصولاً تان نو بلکہ اخلاقی طورا دی جم جوݰونو نوبوئے۔

اسپہ رویہ، خُورو ای منٹو بچین دی برداشت نوکوسی مگم تان ہتے کورمو تان کہ اریتام ہتے بچین بیشر پونج جواز پیش کوسی ۔ریکو مطلب ہیہ کہ، مہ کیہ دی کوروم غلط نو، خورو کیہ دی کوروم غلط۔

زمانہ بدل ہوئے، ہے بچین دیتی اسپہ تان زندگی تیریکو طریقو بدل کوریلیک بوئے۔ وختو سوم جوستہ تان سورو بدل کوریلیک بوئے۔ ہروقت، ہر ژاغہ حکومتو نفری گیتی کوس ݯھیݯھیک نوبوئے۔ لودرونگار ہوئے۔ لو اوشوئے روڈا پھارنیسیکو گلائی۔

ای ذمہ دار شہریو حیثیتہ اسپہ جو اشناریان خیالو لکھیلیک بوئے۔ اولانو تان ژانو مالو وا جوؤ خورو ژانو اوچے مالو حفاظت۔ اسپہ تان موژی ہموݰ کہ خیال نو لکھیتام اسپہ تان دی پریشان بوسی وا خورو دی پریشان کوسی۔

اسپہ سفوسار پروشٹی ہیہ لوؤ ہوݰ کوریلیک بوئے کہ ای حادثہ بیکار اچی کا صحیح وا کا غلط رے فیصلہ کہ ہوئے دی ہتو فائدہ کیاغ بوئے۔ سین سیرو موڑو اف شوخڅیتائے۔کوریکو کہ ہے نقصان ژانو صورتہ بویانہ کہ نو مالو صورتہ ہے پریشانیو مدوا نوبوئے۔

راہو موژو گانی مشقولگی یا موٹرو راہو موژو کوسیک کیہ دی حسابہ سہی نو۔ کورا کہ کوساوا مشقولگیو یا ضروری لوؤ دیکو ضرورت کہ پوریتائے راہار پھوک نیشی نیسی یا فرخ ژاغہ بی تان لوؤ دین بوئے۔ لیکن مسئلہ صرف ہیہ شیر حالتو اوچے وقتو تقاضو ہوݰ کوریلیک۔