اسکولوتے بیک اوچے معیاری تعلیم – ذیل کھوار

ہنون زمانا تعلیمو بچین رسائی ہرکوستین ضرور شیر ہیغین دیتی ہݰ ریک بجا بویا کی اسکولتے بیک اوچے تعلیم حاصل کوریک اے اشناری۔ مہ خیالہ محض اسکولوتے بیک اوچے تعلیم حاصل کورہک ای برابر نو۔ ہیہ لو حقیقت کی تعلیم کیہ دی ملکو بنیاد، ہیغین دیتی ہو پولیٹکل ترجیح جوݰی ہے ویلٹی مضبوط عملہ انگیکو بݰ پالیسی نہ صرف ساؤزئیکو ضرورت شیر بلکہ ہتو ایکٹیولی منیٹر کوریک دی ہانی تان بنیادی اشناری۔

تعلیمو نظامو صحیح کوریکو خوشپو حقیقتا انگیکو بچین مخلصانہ کوشش ریکو لازم و ملزوم تان مگر ہیرا ہانی وقت دی گنیر۔ تعلیمو تین رسائیو ای اشناری ہو مطلب ہݰ کی زیادہ تعداد ا اسکولان موجود بیک، شاگہتاںان ضرورتو مطابقا اساتذان بیک مگر معیاری تعلیم ای خور اشناری۔ کلاس روم بیک ضروری، اُستاذان بیک دی ضروری، بستو کتاب بیک دی ضروری، مگر ہیتاں صفان سار اہمیت ہیہ لو لکھویان کی، کیا استاد کی ای کلاسی سبق ݯیݯھئیران ہیس تان ہے کورمہ کنډوری ٹرین، ہس کنډوری تان ہے جابو ہوݰ کویان، وا کنډوری تان کورمو سوم مخلص۔

حالیہ تحقیق ہیہ لوو دویان کی ہائر ایجوکیشنو منیج کوراک کالج گریجویٹن تعلیمو سارخوشان نکی، ہوسار ہیہ لو ثابت بویان کی سکول اوچے, کلاس رومز اوچے استاذان بیک تعلیم یافتہ قوم ساوزئیکو گارنٹیو نو دویان۔ دی سوال ہݰ پیدا بویان کی ہیت کی نو کوراک بیرانی دی کمی کورا شیر کی ہتو پورا کوکو ضرورت۔ ای خور تحقیق ہیہ لوو دویان کی تعلیمو معیاری ساوزئیکو بچین، کریکولمو وقتو سوم جوستہ وا اسٹوڈنٹسان ضرورتو سوم جوستہ تبدیل بیلیک۔ جان ڈیوی ایمریکن فلسفر وا ایجوکیشن ریفارمر، کرکیولمو ڈیفائن کوری ران کی "کرکیولم ہݰ اشناری نو کی استاذ ای فکس کنلجو شاگیہتانان موژا منتقل کوئے، ای کما مضمونان ݯیݯھئیر بلکہ کریکولم ہݰ اشناری کی ہو کلاس رومو اندرنی ٹیچر اوچے اسٹوڈنٹس ایکسپرینس کونی۔” مثالو طورا، ریل لائفا باک اشناریان موژی مینٹل اسٹریس، ڈیپریشن، منی مینجمنٹ، نیٹ ورکنگ، ریفرنسنگ، او اسٹوڈنٹو ضرورتو مطابقا اُستاد کلاسی ٹرین کوری ویݰونو بوئے, لیکچر دوئے، یا گروپ پراجیکٹو شکلہ اصل زندگیہ باک اشناریان سار تان شاگیہتانان آگاہ کوئے۔÷

جان ڈیوی مزید ہݰ ران کی معیاری تعلیم رویان مشکلاتان سوم ڈیل کوریک ݯیݯھئیر۔ ہو مطلب ہݰ کی کم نمبر گنی تان سورو ماریک، یا کیہ سرکاری نوکری نو لے پھوک پیمانہ بزنس تانتے شروع کوکو تان بچین شرم جوݰی ڈیپریشنہ زندگی تیرئیکو منتخب کوئے۔ جان ڈیوی مزید ہݰ ران کی تہ اسکولہ ای ہݰ استاذ کی اسیتائی ہسے ای قسمو قدیمی علم منتقل کوریکو کی دی اوشوئے، وا ہتے سکولا چیک اینڈ بیلینسو سسٹم کی ای انوسو سکول وزیٹا بی حاضری چیک کوری اچی گینک کی باؤ اوشوئے ہتے ژاغا څیڅیق سکولار محروم نو بونی، البتہ کیاغ ݯیݯھیک وا میاری تعلیم حاصل کوریک ہݰ ژاغا ممکن نو بوئے ران۔ ہیغین دیتی اسکولوتے بیک اوچے معیاری تعلیم حاصل کوریک ای اشناری نو۔