شندور میلہ

ݯھترارو قومی تروئے بسی شندور میلہ جولائیو مسو سوت تاریخاری گانی نیوف تاریخہ پت جاری بہچی پوروزیتائے ۔ ݯھترار استورغاڑوفائنلوگانیتائے۔ بات ختم پیسہ ہضم ۔ مگر شندور میلہ ݯھترارو ای روایتی میلہ بیکو سوم جوستہ اسپہ کا ہݰ دونیتامہ کہ ہیہ میلا ݯھترارو باریہ کندوری اشناری بیریرو رویان پروشٹہ نویوکو ہونی.ثقافت اوچے تہذیبو تمدنو بارا لو دومان۔ ہیہ تروئے بس بیریو روئے ݯھترارو باریہ کندوری معلومات، جم تاثر گانی باغانی کہ ہتیت تان ژاغین بوغاؤ کہ ہیمتان لوؤ پرانی ہیتان لوؤ کارکوری خور مینو سالوتین ہیہ میلہ شرکتو تین گونی۔ ہݰ کیہ لوؤ ہے رویانتین پتہ ہویا کہ ݯھترارو ثقافت کیاغ؟ ہیی روئے کیہ وار کونیان۔ ہیتان تہذیب اوچے تمدن کیچہ بیرائے رے۔ اگر کہ نو،تھے ہموتین ݯھترارو میلہ ریکو کیہ مقصد وا اسپہ ہیہ سوم خوشانی کھیوتین۔موڑی دیرو ہمی تصویران لوڑی تان ذہنہ دونور خٹک ڈانس، بیٹنی گروپ وزیرستانو پھوران ڑینگئَے پھوناک،اسکوٹو کھونگیر دیاک وا ایف سی پی ایس مستوجو جیوے پاکستان راک څیڅیق کیچہ ݰیلی کوری اسپہ کلچرو اوچے ثقافتو پروشٹی الیکو بچین کوروم کونیان۔ شندورا ہیتان ہے پھونیک نوبیروا روئے اسپہ کیہ ہوݰ کوریسینی۔ خاص کوری تھویک گانی پھونی ایھ بی یو دیتی ہمی روئے اسپہ ہوشا ر ارینی کہ تھویک موشو زیوار رے۔ اے بختو اساکان ہنیسے دی ہوݰ نو اریتامی ای کمہ سال ہݰ گوئے کہ اسپہ ہمی میزبانان اسپہ شندورہ داخلو بند کونی۔ ہیغین دیتی موڑی دیرو ہمی تصویران جم لوڑی تان ثقافتو ہیہ موژی مݰکی لاوار۔