دونیکو بݰ لو

ای سوال ہݰ کہ پاکستان ساؤزبیکار پروشٹی اسپہ سوم کیاغ اوشوئے ۔ای خور سوال ہݰ کہ اسپہ تان تنتین کیاغ کوسیان وا پاکستان اسپتین کوئے۔ وا ای سوال ہݰ کہ ہتے رویانتین کا کیاغ کونیا؟ کاکہ تان تنتین کیاغ نوکوراؤ اوشونی۔ای خور دونیکو بݰ سوال ہݰ کہ کاکہ تان بچین کیاغ کہ نو اریر ہتوبچین خور کا کیاغ کونیا؟ ہیغار دی خور سوال ہݰ کہ کاکہ تان بچین کہ نودونیتائے ہتو بچین خور کا دونینیا؟

پاکستان

اسپہ نست تان پاکستانو ہوݰ کوریلیک کہ اسپہ پاکستان کیوالو۔مہ خیالہ اسپہ کیہ ژاغہ کہ غیچ ہوری اسوسی ہسے اسپہ پاکستان۔ کورا کہ بوردی اسوسی ہیس اسپہ پاکستان۔کورا کہ کوروم کوسیان ہیس اسپہ پاکستان۔ کیہ ادارو سوم کہ اسپہ تعلق شیر ہیس اسپہ پاکستان۔ کیہ کھاسپو کہ کوسیان ہے کھاسپ اسپہ پاکستان۔ کیہ کاروبارو سوم کہ تعلق شیر ہے کاروبار اسپہ پاکستان۔ کیہ ژاغا کہ حال بوسیان ہے حال بیکو ژاغہ اسپہ پاکستان۔کیہ کمرائی کہ پریسیان ہیس اسپہ پاکستان

خدمت

اسپہ کیہ ژاغا کہ حال بوسیان ہے ژاغو بچین جم دونیک ملکو خدمت۔ کیہ ادارو سوم کہ تعلق شیر ہتو پروشٹی الیک ملکوتین ترقی دیک۔کیہ پیشو زمہ داری اسپہ سوم کہ شیرہتو سہی ادا کوریک اسپہ ملکو ساؤزیک۔ کیہ کوروم کہ اریتام ہتو جم کوری کوریک ملکو مستحکم کوریک۔ایوال ایوالیو سوم جم سلوک پاکستانا امن قائم کوریک ۔راہو اوغ نو دیک ملکو خزانو بچت کوریک۔ راہا شیرو بوختو پھارو لکھیک معاشرہ بہتری انگیک۔اوغوغلط استعمال نوکوریک ضرورت مندو سوم مدد کوریک۔بشلیو بیݰ نو ݯاکیک لوڈ شیڈنگ نوکوریکہ ادارو سوم یوان بیک ۔کیہ دی آفسہ،عوامی ژاغا،غولہ بی مہمیز کوری پروشٹی نونیسیک قانونو مددو کوریک۔

بباتی کوروم

ای بزرگو قول شیر کہ ” اوا صرف غیژی نفری۔ مگم اوا ای نفری۔ اوا معاشرا ہر ای کورمو کوریکو نوبوم۔ مگم اوا تان بباتی کورمو کوریکو بوم۔ کھیوکہ کوریکو بیتام۔ ہتے کورمو کوم اللہ ہو مددو سورا اوا ہتے کورمو ضرور کوم”۔

اسپہ اگرکہ پاکستانو ترقی مݰکیسیان اسپہ تان تان کوریکو بݰ کورمان سہی طریقہ کوریلیک بوئے ۔ وگرنہ ایوال ایولیوتین استوسیکو سورا کیہ معاشرہ دی بدل نو بیتی شیر۔