ای محفلہ ای ݰیلی، معزز، معتبر وا اشپیرو ریگیݰی ای واقعہ بیان کوری ریتائے کی، "ای موش بیرائے ہتو ہواز دخت بیرائے، ہیس ای دیھہ بی اذان ریکو ہے دیھو روئے ہورو سوم ہلہاویز بیتی ہورو شکریو کوری اسونی۔ روئے بشار کوکو ہے دیھو روئے رے اسونی کی اسپہ ای یہودی برار مسلمان بیتی استائے، ہسے اچی یہودی ہوئے تھے اسپہ خوشان۔ ائے ہݰ کو ہو ریکو ہے مسلمان بیتی اچی یہودی بیرو موش رے اسور کی ہمونی دخت ہوازا اذانو وجہین کی جنتی بین باک بیرائے جنت دی مہ بس رے اسور۔”
ہے محفلہ بو روئے استانی، سف سخت ہوسیتانی۔ ہے معتبر میکیو ناسہ ای پین دَݰمن دی استائے، ہسے دی سخت دوڑ ہوازا ہوسیتائے۔ مہ تان ہے میکیوتے جواب دیارو دی ہائے لیکن ہے میکیو اشپیرو ریگیݰ متے گیرانیتائے۔
ہے نسہ اسیرو ہے ہوساک دَݰمن جمعو انوس بیان کوری بو ٹیرہ پٹارہ اریر مگم متے بو نوژان ہیس ای آیتو ترجمہ کوکو اریر۔
لقد خلقنا الانسان فی احسن تقویم
ہے دَݰمنو کاردو ترجمہ: "اللہ اسپہ غوٹ، کاروٹو، کانو، کھوٹو پیدا نو اریر۔”
ای قسمہ لوڑین ہوئے ہیس اللّٰہو تخلیقو مذاق ساؤزئیتائے۔ ہیس نہ صرف ہے رویان حقارتو نظرین لوڑتائے بلکہ ہے محفلہ اسیرو خور اکھابیر رویان دی دل آزاریو اریر۔ ای روایتو مطابقہ قیامتو انوس اللہ تبارک و تعالی ہمی سپیشل رویان ساری معافی مݰکاک بیرائے کی اوا دنیا پیسہ ہݰ پیدا ارتام متے معاف کورور رے۔ دنیا پِسہ رویان بچین ای امتحان اوشوتامی نہ کی ہیتان طنز و مزاح وا تنقیصو ذریعہ۔
ہیا اللّٰہو ہمی خاص رویان باریہ ای مذہبی پہلو اوشوئے، ہمو ای معاشرتی پہلو دی شیر۔ موجودہ دورا کوستے غوٹ، کانو، کھوٹو، ݰا یا کم ذات رے طعنہ دیتی ہیتان سورا مذاق کوریک ای لوٹ جرم۔ مگم اسپہ معاشرا کیہ تعلیم یافتہ، کیہ بے تعلیم، کیہ عالم یا کیہ مہ چقہ عام موش نہ صرف غوٹ مردار رے طعنہ دوسی بلکہ اللّٰہو ہے خاص رویان حقارتو نظرین دی لاڑیسی۔ سوشل میڈیا دی ہیتان سورا مذاق کوریک عام بیتی شیر۔
عام طورا کی لوڑین ہوئے اذان راوا رینی واقئینی وا ݰیاڑ ڑوئینی۔ اسپہ ہے ٹیمہ دی قہری بوسی۔ لیکن کیہ پتہ کی ہے بے زبان مخلوق اللّٰہو حمدو بیان کونیان۔ ہے قسمہ تان ای غوٹ اذان کی ران دی ہورو حقارتو نظرو سورا نو لوڑیلیک۔ کیہ پتہ ہورو مقام دی افضل بار کیچہ کی حضرت بلال حبشی رضی اللہ عنہوو مقام معتبر اوشوئے۔
مختصر ہیہ کی اسپہ کوس دی تانسار پست نو جوݰیلیک۔ اللّٰہو پروشٹہ کوس مقام معتبر وا کوس مقام کم، ہیس صرف اللّٰہوتے پتہ۔ نہ تان علمو، نہ رتبو، نہ اوچوتیو، نہ شکل و صورتو، نہ دولتو، نہ ژاغو، نہ خاندانو، نہ قومیتو سورا فخر کوری خور کوس کم تر جوݰیلیک۔ ہر کورا پست تواضع کی بین ہوئے اللہ انسانو مقامو ݱانگ کوئے۔
