لالو ژاؤ، صوبیدارو برار، ڈاکٹرو نویس ، ہیہ ݯارویلو،ہیس اخونذادہ ،ٹھیکادارو گومیت،موڑدیہو امام توردیہو شاجی۔ ہیہ اسپہ تان موژی تعارف ۔مگم انسانو سفوسار قیمتی اشناری ہتو تان شناخت، ہتو نان تتان ہتوتین لکھیرو نام، ہتو بارا کوستین دی پتہ نوبوئے،نہ تعارفو کورا وا نامو نامینی،نہ ملگیری تو نامو گنینی۔ نانو مہرو نام دی داہکارہ گوئے مگم کتابی نام ہݰ کیہ کورمو نو بوئے۔
دی لا ژان مہ بو ملگیری ہݰ اسونی کی لال، حاکم ،ݯارویلو،صوبیدار،ٹھکادار،ممبر نامو سورا مشہور، مہ ہتیتان سوم نیشیک روپھیک کندروی وختاری شیر۔ مہ دوکانہ گیتی کیہ وت کیہ وت وام دی گنی بینی، کھاتہ دی ہے ناما تان شینی۔ ہیتان اصل نام حنیسے دی متین معلوم نکی۔
لو ہݰ بیلیک کی نا، اسپہ اولانو ملاؤ بیتی تان ایغو تعارفو تان اصل نامو سورا کوریلیک، ایوال ایوالیو بارا ہوݰ کوریلیک۔ مگم اسپہ تعارف ہݰ بوئے کی ہیہ مہ ملگیری لا۔ فلانہ ژاغو حاکم، بو جم موشو ژاؤ، یا فلانی چرمینو میکوژاؤ برار ،مہ میکیو ژاؤ،یا ڈوم دیہو لالو ژاؤ ۔
دی لا ہیہ وجہ شیر کی بعص وختان سورا شرمندہ بین بویان۔کو س بشارو کوراوا حاکم چارویلو ہتے علاقو خور دی بونیان، صوبیدارو ژاؤ ریکو ، صوبیدارو چھور اژیلی دی اسونی تو کوس لووٰ دوسان ریکو، انگہ پنگ بین بویان۔
اے ژان! اسپہ آسان اشناریو مشکل کوری اسوسی،ہیغین دیتی اسپہ تعارف پورا عمر فالانیو ژاؤ اوچے بستانیو نویس اوچے یساول نامو سورا عمرو تیریسیان۔ ہمو ای نقصان ہموݰ شیر کہ ایوال ایوالیو نام اسپہ ساری روخڅونو بونیان۔
دی لا طریقہ ہموݰ بیلیک، اولانو ملاؤ بیتی تان ،تان تعارفو، تان نامو سورا ایغوتین کوریلیک۔ ہیہ مہ نام، فلانی ژاغو سوم مہ تعلق، ہموݰ کوروم کومان۔ بس پورا ہوئے ،باپو اوچے خاندانو تعارف اچو لو۔
دی لا برار لو تہ سہی لا، ہموݰ تعارف کی کورین ہوئے تھے جم معاملہ بویان کیہ، آسان دی بویان۔ اسپہ صرف ہانی ہوݰ کوریلیک کی نو، اسپہ کیہ وختہ کی زندہ اسوسی ہے وختوبچین دونیلیک، اسپہ کوسوم کی نیشسیان ہتو بچین دونیلیک۔
دی لا لال، اسپہ بو نمکین روئے لا ، مہ تعلق تہ سوم شیر،مہ معاملہ تہ سوم شیر، دورو روئی تہ سوم شیر۔ کاروبار،رشتہ داری مہ اوچے تہ، مگم تعارف باپو ذریعہ کی ہتو کوڑ دی پھیرو بیتی شینی۔ مہ کوس باپو سوم کیہ تعلق، نہ ہتو ژانیم، نہ ہتو سوم نیشیک روپھیک۔ ای تازہ انسانو تعارفو بیردو انسانو ذریعوسورا کوری، اچی ہتو نامو استعمال کوری زندہ اسوسی۔
(ہیہ مشقولگیو موژی اسیکہ تان )
اسلام غلیکم مہ ژان حاکم! وغلیکم سلام اے برار ݯارویلو تو ہیو کورا ہاؤ لا۔ اے ژان مہ ہیہ برار صوبدارو ژاؤ دفترا کیہ کوروم بیرائے۔ گیئے لا کوسی گوسی ریکو ہمو سوم بیتی گیتی اسیتام۔ ہتیرا بیکو اسپہ گوݯھو پیرو ژاؤ مہ روئیتو پرائے، ہتو کا ملگیری ہتئے اسیتائے، کوروم تھفہ ݰاؤ ہوئے۔
ایئے مہ برارو ژاؤ ،نیشور لا چائے تھے پی بوغور ، نولا اے برار، اف ہیرا برارو نسہ بی چائے پیتام، کیہ نام لا اے برار اسپہ ہتے نویسو، نام متین دی نوگویان، اے برار اسپہ لشٹ گازو حاکمو نویسٔ لا ۔ او دی لا ہوݰ اریتام نام مہ یاداری دی بغائے ، ایئے ہسے جم اوچوتور موش لا۔
ایئے جام لا حاکم بغاتام، اخونزادو گاڑی اڈہ اوشوئے خبر بیکو ہسے بیر۔ تھے جام لا برار اسکوٹ بابوتین سلام کو، وا مہ مہ نویس حوالدروتین دی مہ سلاموکو، متین کیاغ پیتئے اسیتائے ہتو کیہ پتہ نوہوئے۔ جم لا ݯارویلو اسپہ راہی ہوتام،اوا تہ سلامو حوالدورتین کوم،پوشییکہ پت خدایار۔
