اصول اوچے موسول ای لوڑیکو بو مختلف اشناری ۔مگم ای خورغیچھین کہ لوڑین ہوئے ہمیت کھاڑ لازم او ملزوم دی۔کوریکو کہ اصول اوچے موسول کہ ایغو سوم ملگیری نو ہانی یا موسول اصولو سوم کہ ملگیری نوہوئے اصول ای فالتو اشناری غیری بہچور۔
دی بہچتیائے پاکستانہ ہمیشہ موسولو لوٹھوروئی بہچی گیتی شیر وا اصول شرمندہ باؤ گلی کوچاہی شکایت کوراؤ کوساؤ اسور۔ ہیغین دیتی اوا ہیہ سورا دونی کہ موسولو کامیابیو راز کیاغ ایاکہ موسول بو طاقت وارا ،نو ہیہ بوجامہ، نو روئے ہمو پوشی بوختی ہمو خوشینیانہ ہیہ کیہ وجہ شیر کہ ہر بار ہیہ کو جیت بویان ریئے کافی وخت دونی بہچیتام
اوا ہیہ لوؤتین دی دونیتام کہ وا ہیہ اصولو ہر وخت شکست کوبویان۔ہمو سوم روئے کو مدد نوکونیان۔ ہیہ مہ بچین دونیکو بݰ سوال اوشوئے۔ کندوری وخت ہمو بچین اوا چھوئے انوس دونیتام وا فکر اریتام۔موسولو مقابلہ اصولو کارکردگیو دی لوڑیتام وا ہے سورا دی غور اریتام۔
آخر مجبور بیتی ای ہوݰ کوراک ملگریو سوم تان ہیہ پریشانیو بارا لو پھریتام کہ اے ژان ہیہ اصول ہرژاغا اچی غیستی ہمو کیہ وجہ ،روئے ہمو کو نوخوشنیان۔ہے دوست متین ای بو مختصر لوپرائے۔
ریتائے کہ اوا موسولو لو ؤ دیکو نوبوم ہیس کو جیت بویان ریئے ،مگر اصولو لوناکام بیکو وجہو لو دوم۔ پاکستانا اصولو ہار بیکو لوٹ وجہ ہموتان کارکردگی شیر۔ضرورت پوریکو اصولو سار روئے کیہ وت کہ جم اشناریو غیچ غیرینیان ہتے وختہ ہیس الٹہ بویان وا اچی بی ہیس تان دی بی موسولو موڑی غیروران۔ ہتے وخت کیہ وت کہ ملک اصول مݰکیران ہے وختہ ہیت تان دی بی ،بے اصولیو دُورا پناہ گانینیان۔ ہیہ وجہین دیتی عام رویان خیال ہیہ بیتی شیر کہ اسپہ ملکا، بے اصولیو عزت شیر وا روئے اصولو سوم جوست بیکو کمزوریو علامت جاݰونیان وا پاکستانہ بے اصولی طاقت وار بیکو علامت شیر۔ہمو ای وجہ ہیہ دی شیر کہ اصولو بچین ساؤزبیرو ادارہ دی کیہ نو کیہ شکلہ بے اصولیو پروشٹی الیکا مدد گار بونیان ۔اصولو بچین ساؤزبیرو ہمی ادارہ جب تک تان عزتو اوچے وقارو ہوݰ نوکونی وا پاکستانو وفادار نوبونی۔ گلی کوچائی مہ غون کوساک موش ہزار دی کہ قانون ریتائے، اصول ریتائے ، ہونسہ اسیرو ہوغون کوچاہی کوساک رویان کارا دوئے عملہ کیہ وت دی نوگوئے۔ طاقتوار تان موسولو گانی اصولو اوچے قانونو پیݰی انگوئے۔
اچی تان تان مہ موختو غیری ریر کہ اے برار دنیا اصول اوچے موسولو جنجال نکی کیہ۔ ۔ تو کیچہ ہوݰ نوکوسان۔ کوریکو کہ اصول بوقسمہ بوژین، ہرکوس تان چیت رائے ۔ ای ایوالیو اصولو مانیکو تیارنو۔ مگم ہے مقابلہ موسول ای وا ہتو کوروم دی ای، وا ہیت سف تان قولو اوچے عملا متحد ۔ ہیغین دیتی موسول ہمیشہ جیت بوئے وا اصول ہمیشہ ہارمانیر ۔ہمو ای وجہ ہیہ دی کہ اصولو پاسداران دی تان عملہ موسولو ہامی۔ آخری لو ہیہ کہ موسولو ای کوروم پیݰیک، ہیس تان کورمو سہی کوری کویان، ہے مقابلہ اصولو کوروم برابری، انصاف،ہیس عملی طورا کمزور۔ہیس تان اصولو بچین تان دی خورو محتاج۔ دی تو تان دونکی ہݰ حالتہ اصولو جیت بیلیکا کہ موسولو۔ ہمی لوان دیتی مہ ملگیری ݰیق کوری ریتائے کہ اسپہ ملکہ اصولو طاقتوار بیکہ بو وخت گانیر ہیغین دیتی فلحال اسپہ سف ای بیتی موسولو سوم جوست بیتی پیݰی انگیکہ دوسی ۔
