لش لوڑین کہ بویان ݯھترارتو کیہ دی پارٹی ہݰ نکی کہ ہسے اقتداراہ نو بہچی اسور ۔ ݯھترارو روئے بو انصاف پسند کوس دی خالی نو لاکی اسونی۔ہمی اقتدارا گیرو پارٹیان موژی صرف ہانی فرق شیر کہ کوس اقتدار پھوک زیاد وا کوس اقتدار پھوک کم، لیکن اقتدارہ ہر ای سیاسی پارٹی بہچی اسور۔ لوؤ نیویشیکو مقصد ہیہ کہ الیکشن بیکوبچین راہ ہموار بیتی شیر، اسمبلی چھیتی شینی ۔ پھوک ملالہ یا ݰاؤ ووٹ بوںی۔ اسپہ لیڈران لوان شوکھور کوراؤ پروشٹہ گونی۔ علاقائی تعصبو لو دی بوئے،برداریو اوچے مسلکو جنجال دی۔ ایغوت کیہ رینی، دیشول کونی ، ایوال ایوالیو نا اہل دی پاشینی۔
مگم ہے الیکشنو موژی صرف ای لو نوبوئے ہسے تان کاردو کورمان بارا لو۔ کیہ دی پارٹی،کیہ سیاسی لیڈر، تان کاردو خدماتان بارا لودیکو سورا تیار نو، وا نا دوئے۔
ہیغار دی لوٹ لو ہیہ کہ ووٹ دیکو وخت کہ ہوئے ووٹ دیاک دی ہیہ لوؤ راخڅونی۔ کوس یادی نوبہچور کہ کیہ لیڈر کہ پروشٹہ گیتی خوروتین کیہ ریران یا لوان شوکھور کویان۔ ہمو تان کارکردگی عملی میدانہ کیاغ۔ووٹو وختہ ووٹ دیاک دی تان علاقو ژاووتین ووٹ دوئے، برادریو اچتو بیر وا کا جنت کرینیکو غمہ بوئے۔ ہیہ لوؤ سورا کا توجہ نودونی کہ کیہ انسان کہ تان دنیو ساؤزیکو نوبویان ہسے آخرتو بچین دی کیہ بو مددگار نوبوئے۔ مگم ای دی نفریو خیال قابل،مخلص ،کورومغارہوݰ کوراک رویو وݰکی نوبیر۔
لو اوشوئے نمائندو کرکاردگیو۔ سیاسی لیڈران تان الیکشن مہمہ ہر لوؤ دونی، ہر مسئلہ ہیتان یادی گوئے، تاریخ،پاکستان، پورا دنیو بارا مدلل وا ݰئیلی بحث کونی۔ لیکن ہیتان کارکردگی عملی میدانہ نوبیکو وجہین دیتی رویان خیالو ہے وݰکی بیکو نولاکونی۔ ہیہ وجہ شیر کہ انتخابار پروشٹی مسلکی،دیہی وا برادریو جنجالان سورا نیزینی۔
ہنیسے ہیہ لوو عوامو سورا لازم شیر کہ کیہ لیڈر کہ ووٹ مݰکی اسپہ دیہا ہائے ہسے اسپتین تان کاردو کورمان لوؤ دیار وا جوؤ ہسے گیاک زمانو بچین ݯھترارو بارا تان منصوبان رویان پروشٹہ لاکھار۔عام رویان سورا لازم شیر کہ امیدوارو کاردوکورمان اوچے گیاگ زمانو بچین منصوبان لوڑی اہلیت اوچے قابلیتو معیار ساؤزیئے ووٹ کہ پھریتام الیکشنار اچی اسپہ پونج سالا پت استاؤسیک اوچے دیشول کوریکو گناہاری بچ بوسی۔
