مظفر گڑھ میں مچھلی کے شکار پر جھگڑا، ایک شخص جاں بحق جبکہ دو شدید زخمی

مظفر گڑھ میں مچھلی کے شکار پر جھگڑا ہونے کے باعث ایک شخص جاں بحق جبکہ دو شدید زخمی ہو گئے ہیں۔

تفصیلات کے مطابق مظفر گڑھ میں تھانہ بیٹ میر ہزار کی حدود لنڈی پتافی دریائے سندھ کے مقام پر مچھلی کے شکار پر جھگڑا ہونے کے باعث سابق وفاقی وزیر عبدالقیوم جتوئی کے بیٹے داود جتوئی کا گن مین عباس غزلانی موقع پر جاں بحق جبکہ دو افراد شدید زخمی ہو گئے ہیں۔

ذرائع نے کہا کہ جاں بحق ہونے والا عباس غزلانی اس وقت داود خان جتوئی کے ماموں ضیاء اللہ جتوئی کے پاس ملازمت کر رہا تھا۔

ذرائع کا کہنا ہے کہ واقعے کی اطلاع پا کر پولیس کی بھاری نفری جائے وقوعہ پر پہنچ گئی ہے۔

پولیس نے کہا کہ گولیاں لگنے سے عباس غزلانی موقع پر جاں بحق ہوا جبکہ رب نواز اور اسحاق شدید زخمی ہوئے ہیں۔ جاں بحق عباس کی لاش اور زخمیوں کو ہسپتال منتقل کیا جا رہا ہے۔

پولیس نے کہا کہ لسکانی برادری کے مسلح افراد فائرنگ کرنے کے بعد موقع سے فرار ہونے میں کامیاب ہو گئے ہیں۔

ذرائع کے مطابق غلام عباس غزلانی کے جاں بحق ہونے اور دو افراد کے زخمی ہونے پر علاقے میں شدید کشیدگی ہو گئے ہے۔ غزلانی اور لسکانی قبیلے کے درمیان بڑھتی کشیدگی کو دیکھ کر مظفر گڑھ سے ریزریو پولیس کے جوان لنڈی پتافی کے لیے روانہ ہو گئے ہیں۔

ذرائع کا کہنا ہے کہ بڑھتی کشیدگی کے باعث سابق وفاقی وزیر قیوم جتوئی اور اس کے بیٹے داود جتوئی کی سکیورٹی پر اہلکار تعینات کر دیے گئے ہیں۔

پولیس ذرائع کا کہنا ہے کہ سابق وفاقی وزیر کے کزن اور اس کے بیٹے کے ماموں ضیاء اللہ جتوئی کی سکیورٹی بھی بڑھا دی گئی ہے۔

ایس ایچ او بیٹ میر ہزار عبدالکریم کھوسہ کا اس واقعے پر کہنا تھا کہ ملزمان کی گرفتاری کے لیے ناکہ بندی کردی گئی ہے اور انہیں جلد گرفتار کر لیا جائے گا۔

The post مظفر گڑھ میں مچھلی کے شکار پر جھگڑا، ایک شخص جاں بحق جبکہ دو شدید زخمی appeared first on .