مردان: سو فیصد نمبرحاصل کرنے والے طلبہ کے پیپرز دوبارہ چیک کرنے کا فیصلہ

خیبرپختونخوا میں میٹرک اور انٹرمیڈیٹ امتحانات میں سوفیصد نمبر حاصل کرنے والے طلبہ کےپیپرز دوبارہ چیک کرنےکا فیصلہ کر لیا گیا ہے۔

تفصیلات کے مطابق وزیرتعلیم خیبرپختونخوا شہرام ترکئی نے اپنے ایک بیان میں کہا کہ مردان تعلیمی بورڈ سمیت صوبہ بھر میں میٹرک اور انٹرمیڈیٹ امتحانات میں زیادہ نمبر حاصل کرنے والے طلبہ کے پیپرز دوبارہ چیک کئے جائیں گے۔

شہرام ترکئی نے کہا کہ طالبہ کے 11سو نمبروں کا سن کر تعجب ہوا، تحقیقات میں معلوم ہوگا کہ پیپرز کی چیکنگ درست طریقہ سے ہوئی ہے کہ نہیں۔

وزیرتعلیم خیبرپختونخوا شہرام ترکئی نے مزید کہاکہ تحریک انصاف حکومت میں سب کچھ میرٹ کی بنیاد پر ہورہا ہے پیپرز کے دوبارہ چیکنگ کےلئے صوبائی سطح کی کمیٹی تشکیل دی جائے گی۔

واضح رہے کہ مردان بورڈ نے منگل کو میٹرک امتحانات کے نتائج کا اعلان کیا تھا جس میں بورڈ میں ٹاپ کرنے والی طالبہ نے 1100 میں سے 1100 نمبر حاصل کرکے سب کو حیرت میں ڈال دیا تھا۔

مردان بورڈ کے میٹرک کے نتائج کے مطابق قندیل نامی طالبہ نے 1100 نمبر حاصل کرکے پہلی پوزیشن حاصل کی جبکہ 1098 نمبر لینے والے تین طلبہ کو دوسری پوزیشن ملی ہے۔

The post مردان: سو فیصد نمبرحاصل کرنے والے طلبہ کے پیپرز دوبارہ چیک کرنے کا فیصلہ appeared first on .