پنجاب بھر میں کورونا وائرس کو روکنے کے لئے موثر حکمت عملی تیار

پنجاب بھر میں کورونا وائرس کے پھیلاؤ کو روکنے کے لئے نیشنل کمانڈ اینڈ کنٹرول سینٹر کی جانب سے ویکسینیشن کے مقرر کردہ اہداف حاصل کرنے کے لئے حکمت عملی مزید سخت کرنے کا فیصلہ کیا گیا ہے۔

تفصیلات کے مطابق نیشنل کمانڈ اینڈ کنٹرول سینٹر کے سیکرٹری عمران سکندر بلوچ نے ویکسینیشن اہداف حاصل کرنے کے لئے تمام محکموں اور سیکٹرز کو مختلف تاریخیں تفویض کردی ہے، انہوں نے کہا کہ تمام سیکٹرز اپنی تفویض کردہ تاریخوں کے مطابق مکمل ویکسینیشن یقینی بنائیں۔

سیکرٹری عمران سکندر بلوچ نے کہا کہ مقرر کردہ آخری تاریخ کے بعد تمام سیکٹرز میں بغیر ویکسینیشن کسی فرد کو کوئی سہولت نہیں دی جائے گی، محکمہ تعلیم سے منسلک افراد اساتذہ، انتظامیہ اور ٹرانسپورٹ اسٹاف 30 ستمبر تک مکمل ویکسینشن کو یقینی بنائیں گے۔

ان کا کہنا تھا کہ بیرون اور اندرون ملک سفر کرنے والے افراد اور ہوٹلز، ریسٹورنٹس اور شادی ہالز میں داخلے کے لئے 30 ستمبر تک کی تاریخ مقرر کی گئی ہے، قومی شاہراہوں پر پبلک ٹرانسپورٹ، بین الصوبائی، شہروں کے اندر اور مابین چلنے والی گاڑیوں، میٹرو، بی آرٹی اورینج ٹرین میں سفر کے لئے 31 اکتوبر تک مکمل ویکسین لگوانا لازم ہوگا۔

انہوں نے کہا کہ کاروباری مراکز میں داخلے اور ہوٹلز اور ریسٹ ہاوسز میں بوکنگ کے لئے 30 ستمبر تک مکمل ویکسینیشن لگوانا ضروری ہوگا، تمام نجی اور سرکاری دفاتر میں کام کرنے والے افراد کے لئے 15 اکتوبر تک ویکسینیشن کروانا لازم ہوگا۔

عمران سکندر بلوچ کا کہنا تھا کہ ٹرین اور موٹروے پر سفر کے لئے 15 اکتوبر تک مکمل ویکسینیشن لگوانے کی شرط عائد کی گئی ہے، ہر قسم کی پبلک ٹرانسپورٹ میں اور ٹرمینلز پر کام کرنے والے افراد کے لئے 15 اکتوبر تک مکمل ویکسینیشن لگوانا لازم ہوگا۔

سیکرٹری عمران سکندر بلوچ نے کہا کہ 17 سال سے زائد عمر کے افراد کے لئے 31 اکتوبر تک ویکسینیشن مکمل کروانے کی شرط عائد کی گئی ہے، مقرری تاریخ کے بعد ویکسینیشن کے بغیر کسی بھی سیکٹر میں کوئی سہولت فراہم نہیں کی جائے گی۔

 نیشنل کمانڈ اینڈ کنٹرول سینٹر کے سیکرٹری عمران سکندر بلوچ نے مزید کہا کہ ٹریفک، موٹروے، ہائی وے پولیس اور ضلعی انتظامیہ ان قوانین پر عملدرآمد اور چیکنگ کی ذمہ دار ہونگی۔

The post پنجاب بھر میں کورونا وائرس کو روکنے کے لئے موثر حکمت عملی تیار appeared first on .