ہمیں دور دراز علاقوں میں پٹرول پمپ کی فراہمی  کو یقینی بنانا چاہیے، صدر مملکت

صدر مملکت ڈاکٹر عارف علوی نے کہا ہے کہ ہمیں دور دراز علاقوں میں پٹرول پمپ کی فراہمی  کو یقینی بنانا چاہیے۔

تفصیلات کے مطابق صدر مملکت ڈاکٹر عارف علوی نے اپنے ایک بیان میں کہا کہ بلوچستان کی سرحد پر باڑ لگانے کا کام مکمل ہوتے ہی پٹرول اور ڈیزل کی اسمگلنگ روکنے میں آسانی ہوئی ہے۔

 ڈاکٹر عارف علوی کا کہنا تھا کہ ہمیں دور دراز علاقوں میں پٹرول پمپ اور سپلائی کو یقینی بنانا چاہیے، موبائل پمپ ایک اچھا متبادل ہوگا۔

صدر مملکت ڈاکٹر عارف علوی کا مزید کہنا تھا کہ گلگت بلتستان میں وسیع سیاحت کی وجہ سے ہمیں پٹرول کی فراہمی کو یقینی بنانا ہوگا۔

دوسری جانب ایوان صدر میں آئل مارکیٹنگ کمپنیوں کے چیف ایگزیکٹو آفیسرز کے اجلاس کی صدارت کرتے ہوئے  صدر مملکت ڈاکٹر عارف علوی نے کہا تھا کہ بلوچستان کے دور دراز علاقوں کی ایندھن کی ضروریات کو پورا کرنے کے طریقے اور ذرائع تلاش کرنے پر توجہ دی جائے۔

 صدر مملکت ڈاکٹر عارف علوی  نے بلوچستان کے دور دراز علاقوں کی ایندھن کی ضروریات کو پورا کرنے کے طریقے اور ذرائع تلاش کرنے کی ضرورت پر زور دیتے ہوئے کہا ہے کہ حکومت بلوچستان کی ترقی پر خصوصی توجہ دے رہی ہے اور صوبے کے عوام کو درپیش مسائل کے حل کے لئے کوشاں ہے۔

 اجلاس میں بلوچستان کو اسمگل شدہ تیل کے ملک کی معیشت پر اثرات کے بارے میں بریفنگ دی گئی تھی۔

اجلاس میں بریفنگ کے دوران صدر مملکت  کو بتایا  گیا تھا کہ ہمسایہ ممالک سے تیل کی اسمگلنگ کی وجہ سے ملکی معیشت کو سالانہ 60 ارب کا نقصان برداشت کرنا پڑتا ہے۔

 ایم ڈی پی ایس او نے اجلاس کو بتایا  تھا کہ ان کے ادارے نے ماضی میں اسمگل شدہ تیل پر انحصار کرنے والے اضلاع کو تیل کی فراہمی کو یقینی بنانے کے لئے سپلائی دوگنا کرنے کے اقدامات کئے ہیں۔

اجلاس میں وفاقی وزیر توانائی حماد اظہر، سیکرٹری پٹرولیم ڈاکٹر ارشد محمود ، منیجنگ ڈائریکٹر اور سی ای او پی ایس او سید محمد طحہ اور معروف تیل کمپنیوں کے سربراہان نے شرکت کی تھی۔

The post ہمیں دور دراز علاقوں میں پٹرول پمپ کی فراہمی  کو یقینی بنانا چاہیے، صدر مملکت appeared first on .