گھی کی قیمتوں کو کنٹرول کرنے کے لیے جامع منصوبہ بندی کی جائے، شوکت ترین

وزیر خزانہ شوکت ترین نے کہا ہے کہ گھی کی قیمتوں کو کنٹرول کرنے کے لیے جامع منصوبہ بندی کی جائے۔

تفصیلات کے مطابق وزیر خزانہ شوکت ترین کی زیرِ صدارت قومی پرائس مانیٹرنگ کمیٹی کا اجلاس ہوا جس میں مشیر تجارت، سیکرٹری خزانہ، سیکرٹری پٹرولیم، صوبائی چیف سیکریٹریز اور اعلیٰ حکام نے شرکت کی۔

اجلاس میں سیکرٹری خزانہ نے بریفنگ دیتے ہوئے کہا کہ عالمی منڈی میں اشیاء کی قیمتوں میں اضافہ مہنگائی کی وجہ ہے، پاکستان گھی، گندم اور چینی درآمد کرتا ہے، کورونا کے باعث عالمی منڈی میں اشیائے صرف کی ترسیل متاثر ہوئی ہے۔

وزیر خزانہ نے چیئرمین ایف بی آر کو گھی کی قیمتوں کا جائزہ لینے کی ہدایت کی۔

شوکت ترین کا کہنا تھا کہ گھی کی قیمتوں کو کنٹرول کرنے کے لیے جامع منصوبہ بندی کی جائے، عالمی منڈی میں پام آئل کی قیمتوں میں یکدم اضافہ ہوا۔

وزیر خزانہ شوکت ترین نے چیف سیکریٹریز کو ہدایت کرتے ہوئے کہا کہ صوبائی حکومتیں روزانہ کی بنیاد پر فلور ملز کو گندم کی فراہمی کو یقینی بنائیں، گندم کی فراہمی حکومتی نرخوں 1950 روپے من پر یقینی بنائی جائے۔

اجلاس میں سیکرٹری صنعت و پیداوار کی پرائس مانیٹرنگ کمیٹی کو چینی کی درآمد کے انتظامات پر بریفنگ دی گئی، کمیٹی نے چیف سیکرٹری پنجاب کو چینی کا درآمدی ذخیرہ مارکیٹ تک بروقت پہنچانے کی ہدایت کردی۔

 معاون خصوصی برائے فوڈ سکیورٹی جمشید اقبال چیمہ نے نیشنل پرائس مانیٹرنگ کمیٹی کو بریفنگ دیتے ہوئے کہا کہ ملک میں غذائی اجناس کو ذخیرہ کرنے کے لیے منصوبہ بنایا جا رہا ہے، دالیں کسان سے پاسکو کے ذریعے خریدنے کی بھی تجویز ہے، دالیں یوٹیلیٹی اسٹورز کے ذریعے سستے داموں میں عوام تک پہنچانے کا پروگرام ہے۔

The post گھی کی قیمتوں کو کنٹرول کرنے کے لیے جامع منصوبہ بندی کی جائے، شوکت ترین appeared first on .