انتخابی اصلاحات کے بغیر پائیدار جمہوریت کاقیام ممکن نہیں، سراج الحق

امیر جماعت اسلامی سراج الحق نے کہا ہے کہ انتخابی اصلاحات کے بغیر پائیدار جمہوریت کاقیام ممکن نہیں۔

تفصیلات کے مطابق امیر جماعت اسلامی سراج الحق نے اپنے ایک بیان میں کہا کہ ای وی ایم مشینوں کی تنصیب حکومت کاالیکشن میں ڈیجیٹل دھاندلی کا منصوبہ ہے۔

سراج الحق نے کہا کہ حکومتی اقدامات مزید تصادم کی راہ ہموار کر رہے ہیں۔ تمام سیاسی جماعتوں کا انتخابی اصلاحات پرمتفق ہونا بے حد ضروری ہے، انتخابی اصلاحات کے بغیر پائیدار جمہوریت کاقیام ممکن نہیں۔

امیر جماعت اسلامی کا کہنا تھا کہ وزیراعظم آئی ایم ایف اور ورلڈ بنک کے مرید نہ بنیں۔

سراج الحق کا یہ بھی کہنا تھا کہ پی ٹی آئی نے الیکشن کمیشن پر چڑھائی کی، عدلیہ پر حملے کئے ، حکومت نے تین برسوں میں معیشت کو مکمل تباہ کر دیا۔

امیر جماعت اسلامی نے کہا کہ ادویات کی قیمتوں میں ایک دفعہ پھر اضافہ ہو گیا ہے جبکہ آٹا، چینی، دال، گھی پہلے ہی عام آدمی کی پہنچ سے دور ہے۔

سراج الحق نے یہ بھی کہا کہ حکمران غریب کو خوراک اور ادویات سے مکمل محروم کرنا چاہتی ہے اور اب حکومت میڈیا کو بھی مکمل کنٹرول میں کرنا چاہتی ہے۔

امیر جماعت اسلامی سراج الحق نے مزید کہا کہ جماعت اسلامی آزادی صحافت کے لئے صحافیوں کی جدوجہد کا ساتھ دے گی۔

واضح رہے اس سے قبل  امیر جماعت اسلامی سراج الحق نے کہا  تھا کہ اقتصادی ترقی کے حکومتی دعوؤں کا زمینی حقائق سے کوئی تعلق نہیں۔

امیر جماعت اسلامی نے کہا  تھا کہ عوام کی اکثریت غربت، مہنگائی کی چکی میں پس رہی ہے، وزیراعظم نے ایک کروڑ نوکریاں دینے کا وعدہ کیا،لاکھوں برسرروزگار بھی بے روزگار کر دیئے۔

سراج الحق کا یہ بھی کہنا تھا کہ افغانستان میں اسلامی قوتوں کی فتح سے سب سے زیادہ تکلیف بھارت کو ہوئی، اقوام متحدہ اور عالمی طاقتیں افغانستان کی تعمیر نو کے لیے طالبان سے تعاون کریں۔ اللہ سے امید ہے افغانستان امن اور ترقی کا گہوارہ ہو گا۔

امیر جماعت اسلامی سراج الحق کا مزید کہنا تھا کہ جماعت اسلامی پاکستان میں اسلامی نظام کے نفاذ کے لیے جدوجہد کر رہی ہے۔ جماعت اسلامی پرامن جمہوری جدوجہد پر یقین رکھتی ہے، ملک میں ترقی اور خوشحالی لانے کے لیے جماعت اسلامی کا ساتھ دے۔

The post انتخابی اصلاحات کے بغیر پائیدار جمہوریت کاقیام ممکن نہیں، سراج الحق appeared first on .