خیبر پختونخوا کے شہری نے ایمانداری کی نئی مثال قائم کردی

پشاور : خیبر پختونخوا کے شہری نے ایمانداری کی نئی مثال قائم کردی ہے ۔

تفصیلات کے مطابق  ضلع خیبر سے تعلق رکھنے والے نیاز ولی کو گزشتہ روز دوران سفر بی آر ٹی میں 19لاکھ روپے سے بھری ایک تھیلی ملی تھی، اس نے کسی بھی قسم کی لالچ کے بغیر ایمانداری کا ثبوت دیتے ہوئے 19لاکھ روپے اس کے اصل حقدار یعنی مالک کو واپس کردئیے۔

ذرائع کے مطابق شہری نیاز ولی نے لاکھوں روپے اس کے اصل مالک تک پہنچانے کےلئے اپنے نمبر سمیت ایک پوسٹ سوشل میڈیا پر شئیرکی تھی ، جس کے ذریعے مالک نے اس سے رابطہ کیا۔

واضح رہےکہ گزشتہ ماہ ملتان موٹروے پولیس نے ایمانداری اور فرض شناسی کی ایک اور مثال قائم کی تھی۔

ترجمان موٹروے پولیس کا اس واقعے کے حوالے سے کہنا تھا کہ ملتان سکھر موٹروے پولیس نے خاتون کا گمشدہ بیگ جس میں سونے کے زیورات بمعہ نقد رقم تھی تلاش کر کے واپس کر دیں۔

رحیم یار خان سے سفر کرنے والی فیملی ملتان سروس ایریا کے واش روم میں خاتون کا بیگ بھول گئی تھیں۔

موٹروے پولیس نے بیگ جس میں انگوٹھیاں اور نقدی تھا، متعلقہ فیملی کو واپس کر کے ایمانداری اور فرض شناسی کی ایک اور مثال قائم کی تھی۔

فیملی نے پیٹرولنگ آفیسر محمد رضوان اور ساجد علی کو بیگ کی گمشدگی اور اپنی پریشانی کے بارے میں اطلاع دی تھی۔

جس کی اطلاع ڈی ایس پی مسرور علی اور ایڈمن آفیسر عمران خان کو دی گئی جنہوں نے فون کر کے سروس ایریا کے واش رومز کو مقفل کروا دیا تھا۔

ترجمان موٹروے پولیس کے مطابق بیگ جس میں سونے کی بالیاں، انگوٹھیاں اور 10 ہزار روپے نقدی موجود تھے خاتون کے شوہر کو واپس کر دیا گیا۔

اس موقع پر موجود افراد اور متعلقہ فیملی نے موٹروے پولیس افسران کی ایمانداری اور  بروقت کارروائی کرنے پر شکریہ ادا کیا۔

The post خیبر پختونخوا کے شہری نے ایمانداری کی نئی مثال قائم کردی appeared first on .