عمران نیازی جہاں زمین کا ٹکڑا دیکھتے ہیں اس کو اونے پونے بیچ دیتے ہیں،عطاء اللہ تارڑ

مسلم لیگ ن کے ڈپٹی سیکرٹری جنرل عطاءاللہ تارڑ نے کہا ہے کہ عمران نیازی جہاں مہنگا زمین کا ٹکڑا دیکھتے ہیں اپنے اے ٹی ایمز کو نوازنے کے لیے اس کو اونے پونے بیچ دیتے ہیں۔

تفصیلات کے مطابق  مسلم لیگ ن کے ڈپٹی سیکرٹری جنرل عطاءاللہ تارڑ نےوالٹن ائیرپورٹ کی نیلامی کے حوالے سے اہم بیان دیتے ہوئے کہا کہ تمام قواعد و ضوابط کی خلاف ورزی کرتے ہوئے نیازی حکومت والٹن ائیرپورٹ کو کل نیلام کرنے جا رہی ہے۔

ان کا کہنا تھا کہ لاہور ہائیکورٹ کے اسٹے آرڈر  کے باوجود عمران نیازی اپنے دوستوں کو نوازنے کے لئے والٹن ایئرپورٹ کی نیلامی کرنے پر تلے ہوئے ہیں،لاہور ہائی کورٹ کے آرڈرز میں واضح طور پر درج ہے کہ یہ زمین متنازعہ ہے اور جب تک اس کی ملکیت کا تعین نہیں کر دیا جاتا تب تک اس کی نیلامی ممکن نہیں۔

عطاءاللہ تارڑ کا کہنا تھا کہ اس ملک کے سب سے بڑے قبضہ مافیا کے سر غنہ عمران نیازی سن لیں اگر یہ والٹن ائیرپورٹ کی زمین عدالتی احکامات کے برخلاف غیر قانونی طور پر نیلام کی گئی تو ان کے خلاف پرچے کی درخواست دیں گے۔

ان کا کہنا تھا کہ زمین کے اصل مالکان اور  رہائشیوں کو بے دخل کرکے اور دن دہاڑے سر کاری وسائل استعمال کرکے اس زمین پر قبضہ کیا جا رہا ہے، سرکاری افسران اس غیر قانونی عمل کو روکنے میں اپنا کردار ادا کریں ورنہ ان کے خلاف بھی قانونی چارہ جوئی کی جائے گی۔

مسلم لیگ ن کے ڈپٹی سیکرٹری جنرل عطاءاللہ تارڑ  کا مزید کہنا تھا کہ والٹن ایئرپورٹ کی تاریخی حیثیت ہے اور یہ لاہورکا ایک قدیم ایئر پورٹ ہے جس پر دن دہاڑے ڈاکا ڈالنے کی کوشش کی جا رہی ہے۔

The post عمران نیازی جہاں زمین کا ٹکڑا دیکھتے ہیں اس کو اونے پونے بیچ دیتے ہیں،عطاء اللہ تارڑ appeared first on .