وہی معاشرہ ترقی کرتا ہے جس میں قانون کی بالا دستی ہو، وزیراعظم

وزیر اعظم عمران خان نے کہا ہے کہ وہی معاشرہ ترقی کرتا ہے جس میں قانون کی بالا دستی ہو۔

تفصیلات کے مطابق وزیر اعظم عمران خان سے سپریم کورٹ بار ایسوسی ایشن کی ایگزیکٹو کمیٹی کی ملاقات ہوئی جس میں بار ممبران نے حکومت کے قانونی اصلاحات ایجنڈے کی مکمل تائید کی اور مزید بہتری کے لیے تجاویز پیش کیں۔

ملاقات  میں  وفد نے گفتگو کرتے ہوئے کہا کہ وزیرِ اعظم عمران خان  ملک میں عدل و انصاف کے نظام میں حقیقی اصلاحات اور مثبت تبدیلی  کی  واحدامید ہیں۔

اس موقع پر سپریم کورٹ بار ایسوسی ایشن کی ایگزیکٹو کمیٹی کے سیکریٹری احمد شہزاد فاروق رانا نے بار کی طرف سے وزیر اعظم کا شکریہ ادا کیا ۔

 سپریم کورٹ بار ایسوسی ایشن نے وزیرِ اعظم کو یقین دہانی کرواتے ہوئے کہا کہ وکلاء برادری  جامع  اور مفصل قانونی اصلاحات متعارف کرانے میں حکومت کا بھرپور ساتھ دے گی۔

ملاقات کے دوران وزیراعظم عمران خان نے  وکلاء ہاوسنگ کالونی میں درپیش رکاوٹوں کو فوری طور پر دور کرنے کی ہدایت دی جبکہ وزیر اعظم نے وکلاء کو صحت کارڈ کی فراہمی کے ساتھ ساتھ نیا پاکستان ہاؤسنگ پروگرام میں شامل کرنے کی بھی ہدایت دی۔

عمران خان  نے ہدایت دی کہ  نوجوان وکلاء کو کامیاب پاکستان پروگرام  میں شامل کیا جائے۔

وزیرِ اعظم نے فروغ نسیم کو ہدایت کرتے ہوئے کہا کہ بار سے مسلسل رابطے کو یقینی بنایا جائے اور بار کی گرانٹس سے متعلقہ ایشو کو بھی ترجیحی بنیادوں پر حل کیا جائے۔

عمران خان نے کہا کہ وکلا تنظیموں کی جمہوریت کے فروغ اور استحکام کے لیے گراں قدر خدمات ہیں۔

وزیراعظم نے یہ بھی کہا  کہ خوشحالی انصاف اور عدل کے نظام سے ہی ممکن ہو سکتی ہے جبکہ وہی معاشرہ ترقی کرتا ہے جس میں قانون کی بالا دستی ہو۔

عمران خان کا کہنا تھا کہ ماضی میں مفاد پرست عناصر نے قانون کا غلط استعمال کیا۔ امیر اور طاقتور طبقہ قانون کی گرفت سے آزاد رہا جبکہ کمزور طبقات کا قانون کے غلط استعمال کے ذریعے استحصال کیا جاتا رہا ۔

وزیراعظم کا یہ بھی کہنا تھا کہ موجودہ حکومت سول اور فوجداری قوانین میں اصلاحات لا رہی ہے تاکہ عام آدمی کو ریلیف مل سکے۔

 عمران خان نے کہا کہ وکلا تنظیمیں قانونی اصلاحات کے ایجنڈے میں حکومت کا ساتھ دیں، قانونی اصلاحات سے عدالتوں پر مقدمات کا بوجھ کم ہو جائے گا۔

وزیراعظم عمران خان نے مزید کہا کہ وکلاء برادری کو درپیش مسائل سے آگاہ ہیں، ان کے حل کے لئے ہر ممکنہ کوشش کی جائے گی ۔

The post وہی معاشرہ ترقی کرتا ہے جس میں قانون کی بالا دستی ہو، وزیراعظم appeared first on .