مسئلہ کشمیر بات چیت کے ذریعے حل کرنے کے خواہش مند ہیں، سعودی وزیر خارجہ

سعودی وزیر خارجہ شہزادہ فیصل بن فرحان کا کہنا ہے کہ مسئلہ کشمیر بات چیت کے ذریعے حل کرنے کے خواہش مند ہیں۔

تفصیلات کے مطابق سعودی وزیر خارجہ شہزادہ فیصل بن فرحان نے دورہ نئی دہلی کے موقعے پر اپنے انٹرویو میں کہا ہے کہ سعودی عرب، پاکستان اور بھارت میں ثالثی کے لیے تیار ہے۔

سعودی وزیر خارجہ نے کہا ہے کہ جب بھی ہو سکا ہم اپنے اچھے فورمز فراہم کریں گے، مسئلہ کشمیر بات چیت کے ذریعے حل کرنے کے خواہش مند ہیں، بات چیت کے وہ راستے اختیار کیے جائیں جس سے مسئلے کا مستقل حل نکلے، کشمیر ایک متنازعہ علاقہ ہے۔

اس سے قبل سعودی عرب کے وزیر خارجہ شہزادہ فیصل بن فرحان نے نئی دہلی میں بھارتی وزیراعظم نریندر مودی سے ملاقات کی تھی اور ان سے دونوں ملکوں کے درمیان دو طرفہ تعلقات اور اہم علاقائی اور عالمی امور پر تبادلہ خیال کیا تھا۔

سعودی وزارت خارجہ کے ایک بیان کے مطابق شہزادہ فیصل نے خادم الحرمین الشریفین شاہ سلمان بن عبدالعزیز اور ولی عہد شہزادہ محمد بن سلمان کا وزیراعظم مودی اور بھارتی عوام کے نام نیک خواہشات کا پیغام پہنچایا تھا۔

بھارتی وزیراعظم نے سعودی عرب کی قیادت کے کرہ ارض کے تحفظ کے لیے کردار اور اقدامات کو سراہا تھا اور انہوں نے بالخصوص ولی عہد شہزادہ محمد بن سلمان کے جاری کردہ سعودی سبزاقدام اور مشرقِ اوسط سبزاقدام کی تعریف کی تھی۔

انہوں نے دونوں دوست ممالک کے درمیان سعودی عرب کے ویژن 2030ء کی روشنی میں اقتصادی شراکت داری کو مستحکم بنانے کے طریقوں کے علاوہ باہمی دلچسپی کے مختلف شعبوں میں تعاون بڑھانے سے متعلق امور پر بھی گفتگو کی تھی۔

The post مسئلہ کشمیر بات چیت کے ذریعے حل کرنے کے خواہش مند ہیں، سعودی وزیر خارجہ appeared first on .