منشیات کا کالا دھندہ کرنے والے انسانیت کے قاتل ہیں،عثمان بزدار

وزیراعلیٰ پنجاب سردار عثمان بزدار نے کہا ہے کہ منشیات کا کالا دھندہ کرنے والے انسانیت کے قاتل ہیں۔

تفصیلات کے مطابق وزیراعلیٰ پنجاب سردار عثمان بزدار سے ڈائریکٹر جنرل اینٹی نارکوٹکس فورس میجر جنرل غلام شبیرناریجو کی ملاقات ہوئی جس میں منشیات کے دھندے کے خاتمے کیلئے مربوط حکمت عملی کے تحت مشترکہ اقدامات پراتفاق کیا گیا۔

ملاقات میں وزیراعلیٰ پنجاب سردار عثمان بزدار نے اینٹی نارکوٹکس فورس کی کارکردگی کی تعریف کی۔

 عثمان بزدار نے کہا کہ منشیات کی خریدو فروخت کرنے والے عناصر کی رعایت کے مستحق نہیں۔، منشیات سے پاک معاشرے کیلئے سب کو مل کر جدوجہد کرنی ہے۔

وزیراعلیٰ پنجاب کا کہنا تھا کہ تعلیمی اداروں کے باہر منشیات کا مکروہ دھندہ کرنے والوں کی جگہ جیل ہے، تعلیمی اداروں کے باہر منشیات کا کاروبار کرنے والے عناصر کی سختی سے سرکوبی کی جائے گی۔

عثمان بزدار کا یہ بھی کہنا تھا کہ منشیات کا کالا دھندہ کرنے والے انسانیت کے قاتل ہیں، منشیات کے عادی افراد کی بحالی کیلئے مزید ادارے قائم کریں گے۔

وزیراعلیٰ پنجاب نے کہا کہ پنجاب حکومت منشیات کے عادی افراد کے علاج معالجے کیلئے ہسپتال کے قیام کیلئے اینٹی نارکوٹکس فورس کیساتھ تعاون کریگی۔

عثمان بزدار نے یہ بھی کہا کہ کسی کو قوم کے مستقبل تباہ کرنے کی اجازت نہیں دیں گے۔ پولیس،ایکسائز اورمتعلقہ محکمے اینٹی نارکوٹکس فورس کو ہر طرح کی معاونت فراہم کریں گے۔

وزیراعلیٰ پنجاب سردار عثمان بزدار نے مزید کہا کہ پنجاب حکومت اینٹی نارکوٹکس فورس کے ساتھ مکمل تعاون جاری رکھے گی، نوجوان نسل کی رگوں میں زہر گھولنے والوں کے خلاف بلاتفریق کارروائی ہوگی۔

The post منشیات کا کالا دھندہ کرنے والے انسانیت کے قاتل ہیں،عثمان بزدار appeared first on .