پاکستان پیپلزپارٹی کا نصب العین عوام کی خدمت ہے، بلاول

چیئرمین پیپلز پارٹی بلاول بھٹو زرداری  نے کہا ہے کہ پاکستان پیپلزپارٹی کا نصب العین عوام کی خدمت ہے۔

تفصیلات کے مطابق چیئرمین پیپلز پارٹی بلاول بھٹو زرداری سے  وزیر بلدیات ناصر حسین شاہ کی بلاول ہاؤس میں ملاقات ہوئی جس  میں بلاول بھٹو کو ناصر شاہ نے محکمہ بلدیات کی کارکردگی سے آگاہ کیا۔

ملاقات میں  چیئرمین پیپلز پارٹی بلاول بھٹو زرداری نے ہدایت دی کہ عوام کے مسائل کے حل کے تسلسل میں کوئی کسر نہ چھوڑی جائے۔

چیئرمین پیپلز پارٹی نے کہا کہ سندھ میں پاکستان پیپلزپارٹی کی کارکردگی دوسری تمام صوبائی حکومتوں سے بہتر ہے۔

 بلاول بھٹو زرداری نے کہا کہ حل ہوتے ہوئے بلدیاتی مسائل کی آڑ لے کر منظم طریقے سے سندھ کا تاثر تباہ کرنے کی سازش کو بخوبی سمجھتا ہوں، پاکستان پیپلزپارٹی کا نصب العین عوام کی خدمت ہے، ہم اپنا کام کرتے رہیں گے۔

 چیئرمین پیپلز پارٹی بلاول بھٹو زرداری نے مزید کہا کہ روشنیوں کے شہر کی رونقیں جیالوں نے بحال کی ہیں، ہم کارکردگی سے اپنا لوہا منواتے رہیں گے۔

 واضح رہے چیئرمین پیپلزپارٹی بلاول بھٹو نے برطانوی نشریاتی ادارے کو انٹرویو دیتے ہوئے کہا  تھا کہ میری تجویز ہے کہ طالبان کے معاملے پر وزیراعظم پارلیمان میں بھی بحث کروائیں۔

بلاول بھٹو نے کہا تھا کہ طالبان کی حکومت کو تسلیم کرنے سے متعلق وزیراعظم کا بیان خوش آئند ہے۔

اپنے بیان میں بلاول بھٹو کا کہنا تھا کہ بدقسمتی سے اب تک اس اہم معاملے پر پارلیمان میں بحث نہیں ہو سکی ، خطے کا امن افغانستان سے جڑا ہواہے ، افغانستان سے متعلق فیصلہ افغان عوام کو کرنا ہے۔

چیئرمین پیپلزپارٹی بلاول بھٹو نے کہا  تھا کہ افغان عوام کو ان کے حقوق دینا ہوں گے ، عالمی برادری کو افغانستان کی مدد کرنا ہوگی۔

The post پاکستان پیپلزپارٹی کا نصب العین عوام کی خدمت ہے، بلاول appeared first on .