عوام اور سیاسی جماعتیں اس حکومت کے خلاف میدان میں آئیں، رانا ثناء اللہ

مسلم لیگ (ن) کے رہنما رانا ثناء اللہ کا کہنا ہے کہ عوام اور سیاسی جماعتیں اس حکومت کے خلاف میدان میں آئیں۔

تفصیلات کے مطابق انسداد منشیات عدالت میں رانا ثناء اللہ نے میڈیا سے گفتگو کرتے ہوئے کہا کہ  اگر یہ حکومت ایک سال اور رہی تو پاکستان کو مزید پیچھے لے جائے گی۔

ان کا کہنا تھا کہ ججز کو باتھ روموں میں بٹھا دیا ہے، کورٹس کو کسی مناسب جگہ پر بٹھایا جائے، چیف جسٹس لاہور ہائیکورٹ اس بات کا نوٹس لیں۔

رانا ثناء اللہ کا کہنا تھا کہ حکومت نہ صرف اپوزیشن کے خلاف جعلی کارروائیاں کرنے میں مصروف ہے بلکہ حکومت ملک کے خلاف کام بھی کر رہی ہے، حکومت نے ملک کو زوال پزیر بنادیا ہے۔

انہوں نے کہا کہ حکومت نے بجلی کا بل ،بچوں کی روٹی اور مریضوں کی دوائیاں مشکل کر دی ہیں، حکومت نے ملک کی خارجہ پالیسی کا بھی بیڑا غرق کر دیا ہے۔

رانا ثناء اللہ نے کہا کہ ڈبو اور چھیدا ٹلی کہتے ہیں کہ نیوزی لینڈ ٹیم کو انڈیا نے بھیج دیا ہے ، یہ انڈیا کی تعریفیں کیوں کر رہے ہیں، اس حکومت کی کوئی پالیسی نہیں ہے۔

ان کا مزید کہنا تھا کہ یہ حکومت بلدیاتی الیکشن نہیں کرائے گی، اس حکومت کے لیے بلدیاتی الیکشن جیتنا ممکن نہیں ہے۔

The post عوام اور سیاسی جماعتیں اس حکومت کے خلاف میدان میں آئیں، رانا ثناء اللہ appeared first on .