سی پیک پاکستان اوراس خطے کی خوشحالی کیلئے گیم چینجر کی حیثیت رکھتا ہے ، عبدالقیوم نیازی

وزیراعظم آزادجموں وکشمیر سردار عبدالقیوم نیازی نے کہا ہے کہ سی پیک پاکستان اوراس خطے کی خوشحالی کیلئے گیم چینجر کی حیثیت رکھتا ہے۔

تفصیلات کے مطابق وزیراعظم آزادجموں وکشمیر سردار عبدالقیوم نیازی نے جوائنٹ کوآپریشن کمیٹی برائے چائنہ پاکستان اکنامک کوریڈور کے دسویں اجلاس سے ویڈیو لنک کے ذریعے خطاب کرتے ہوئے کہا ہے کہ سی پیک پروجیکٹس کی تکمیل سے یہاں تعمیر وترقی کا انقلاب آئیگا اور امن کو فروغ ملے گا۔

انہوں نے کہا کہ مانسہرہ مظفرآباد منگلا روڈ منصوبے پر سی پیک کی جوائنٹ کوآپریشن کمیٹی کا شکرگزار ہوں ، امید ہے کہ اس منصوبے پر کام کا جلد آغاز ہوگا ، ایسٹرن کوریڈور سے آزادکشمیر اور پنجاب کو گلگت سے ملانے کیلئے رتو شونٹر ٹنل کی تعمیر سے مظفرآباد اور گلگت کا سفر بہت آسان اور مختصر ہوجائیگااور مظفرآباد سے گلگت کا فاصلہ صرف8گھنٹے کا رہ جائیگا ، اس منصوبے کو بھی سی پیک میں شامل کیا جائے۔

وزیراعظم آزادجموں وکشمیر سردار عبدالقیوم نیازی نے کہا کہ ما نسہرہ مظفرآباد منگلا روڈ کی تعمیر سے آزادکشمیر کے تمام اضلاع آپس میں منسلک ہو جائیں گے جبکہ جنوبی علاقوں سے رابطہ بہت مختصر رہ جائیگا۔

سردار عبدالقیوم نیازی نے کہا کہ وزیراعظم پاکستان عمران خان سی پیک کو کامیاب بنانے کیلئے پرعزم ہیں اور اس حوالے سے وہ خود تمام معاملات کی مانیٹرنگ کرتے ہیں ، آزادکشمیر کو سی پیک کے منصوبوں میں شامل کرنا عمران خان کا آزادکشمیر کی تعمیر وترقی میں دلچسپی لینے کا عکاس ہے ، آزادکشمیر قدرتی حسن سے مالا مال پرامن اور سرمایہ کاروں کیلئے پرکشش خطہ ہے، یہاں سیاحت، ہائیڈ ل،لائیوسٹاک اورزراعت کا وسیع پوٹینشل موجود ہے۔

انہوں نے کہا کہ آزادکشمیر کی 49فیصد آبادی 15سے49سال کے درمیان ہے، وسائل کو بروئے کار لا کرہیومین رسورس سے فائدہ اٹھایا جاسکتا ہے اور روزگار کے مواقع اور معیشت میں بہتری لائی جا سکتی ہے ، آزادکشمیر میں دس فیصد سے زائد آبادی بیروزگار ہے سی پیک کے زیر اہتمام اسٹیٹ آف دی آرٹ ٹیکنیکل اینڈ ووکیشنل سینٹر زقائم کر کے بیروزگاری پر قابو پایا جا سکتاہے۔

وزیراعظم آزادجموں وکشمیر سردار عبدالقیوم نیازی نے کہا کہ میرپور آزادکشمیر میں اکنامک کوریڈور کیلئے زمین مختص کی گئی اس کو بھی سی پیک میں شامل کیا جائے۔

اجلاس میں وفاقی وزیر برائے منصوبہ بندی اسد عمر،چاروں صوبوں اور گلگت بلتستان کے وزراء اعلیٰ سمیت سی پیک حکام نے شرکت کی۔

The post سی پیک پاکستان اوراس خطے کی خوشحالی کیلئے گیم چینجر کی حیثیت رکھتا ہے ، عبدالقیوم نیازی appeared first on .