انسانی تعلق کی بنیاد ہمدردی ہے، صدر مملکت

صدر مملکت ڈاکٹر عارف علوی نے کہا ہے کہ انسانی تعلق کی بنیاد ہمدردی ہے۔

تفصیلات کے مطابق  صدر مملکت ڈاکٹر عارف علوی نے الزائمر کے عالمی دن کے  موقع پر نیشنل ڈیمنشیا پلان کے اجراء کی تقریب سے خطاب کرتے ہوئے  کہاکہ  ہر انسان کی خواہش ہوتی ہے کہ عمر کے کسی حصے میں کسی کا محتاج نہ بنے ،عمر کے آخری حصے میں انسان کی یاداشت کم ہوتی جاتی ہے۔

صدر مملکت نے کہا کہ  صحت مند زندگی اور بڑھاپے میں نسیان کی بیماری کی شدت میں کمی کے لئے  ذہنی اور جسمانی ورزش  اور  نشوونما ضروری ہے۔

ڈاکٹر عارف علوی  نے یہ بھی  کہا کہ جسم کی ورزش سے بدن میں توانائی پیدا ہوتی ہے اسی طرح ، الزائمر سے کمزور ہونے والے دماغی خلیوں کو ذہنی مشقوں کے ذریعے بحالی میں مددملتی ہے۔

  صدر مملکت  کا کہنا تھا  کہ  وزیراعظم عمران خان نے والدہ کی یاد میں ایک عظیم مقصد کیلئے شوکت خانم میموریل ہسپتال تعمیر کیا۔

ڈاکٹر عارف علوی نے کہا کہ میڈیکل کی تعلیم میں موروثی بیماریوں سے متعلق آگاہی دی گئی ہے لیکن اس حوالے سے کوئی الگ شعبہ نہیں ہے۔

 صدر مملکت ڈاکٹر عارف علوی نے مزید  کہا کہ پاکستان میں دنیا کے مقابلے میں خاندانی نظام مضبوط ہے۔ خاندان میں بزرگوں کا بھر پور خیال رکھا جاتا ہے۔ خاندان کو الزائمر کے مریض بزرگوں کی مشکلات کو سمجھناضروری ہے۔

اس موقع پر اظہار خیال کرتے ہوئے وزیر اعظم کے معاون خصوصی برائے قومی صحت ڈاکٹر فیصل سلطان نے کہاکہ معاشرے میں صحت کی سہولیات کی فراہمی کے لئے ہر ممکن اقدامات کررہے ہیں۔

بزرگوں کو سہولیات کی فراہمی کے لئے تمام وسائل بروئے کارلانے کی ضرورت ہے۔

الزائمر کے شکار مریض کے اہل خانہ کو بھی پریشانی کا سامنا کرنا پڑتا ہے، ایسے مریضوں کی دیکھ بھال کے لئے جامع حکمت عملی وضع کرنا ضروری ہے۔

صوبائی وزیر صحت پنجاب ڈاکٹر یاسمین راشد نے  اپنے خطاب میں کہا کہ اپنے بزرگوں کا خیال رکھنا ہمارے دین کا حصہ ہے۔ الزائمر سے متعلق نیشنل ایکشن پلان میں صوبوںکوشامل ہونا چاہیے۔

The post انسانی تعلق کی بنیاد ہمدردی ہے، صدر مملکت appeared first on .