کراچی میں رینجرز اور پولیس کی مشترکہ کارروائی، چوری اور ڈکیتی میں ملوث 2 ملزمان گرفتار

 شہر قائد میں رینجرزاور پولیس کی جانب سے مشترکہ کامیاب کارروائی کی  گئی ہے۔

تفصیلات کے مطابق  رینجرز اور پولیس نے انٹیلی جنس معلومات کی بنیاد پر مشترکہ کارروائی کرتے ہوئے کراچی کے علاقے لالو کھیت نمبر 10 سے چوری اور ڈکیتی میں ملوث 2 انتہائی مطلوب ملزمان کاشان عرف شانی اور علی جان کو گرفتار کر لیا ہے۔

ترجمان سندھ رینجرز کا کہنا ہے کہ ملزمان کے قبضے سے اسلحہ ایمونیشن اور 2 عدد موٹر سائیکلیں بھی برآمد کرلی گئی ہیں جبکہ ملزمان کا تعلق ” پپو ڈکیت گینگ ” سے ہے۔

ترجمان سندھ رینجرز نے بتایا ہے کہ ملزمان 2017 سے کراچی کے مختلف علاقوں پُرانا گولیمار، ماربل مارکیٹ، نیا گولیمار، سائیٹ ایریا، گارڈن، بورڈ آفس لالو کھیت اور کریم آباد کے علاقوں میں چوری، ڈکیتی اور موبائل فون چھیننے کی متعدد واردتوں میں ملوث ہیں ، ملزمان نے مورخہ 8 ستمبر 2021 کو نیا گولیمار میں سینٹری مارکیٹ پاکستان ٹریڈرز میں ڈکیتی کی جسکی ویڈیو سو شل میڈ یا پربھی وائرل ہوئی تھی۔

ترجمان سندھ رینجرز  نے یہ بھی بتایا کہ رینجرز نے تکنیکی ذرائع استعمال کرتے ہوئے ملزمان کو چھینے گئے موبائل فونز، موٹرسائیکل اور اسلحہ و ایمونیشن سمیت گر فتار کرلیا ہے جبکہ ملزمان کے دیگر ساتھیوں کی گرفتاری کے لیے چھاپے مارے جارہے ہیں۔

واضح رہے کہ گرفتار ملزمان کو بمعہ اسلحہ، ایمونیشن، 2 عدد موٹر سائیکل اورچھینے گئے موبائل فونز سمیت مزیدقانونی کارروائی کے لیے پولیس کے حوالے کردیا گیا ہے۔

خیال رہے کہ رینجرز کی جانب سے یہ اپیل کی گئی ہے کہ  ایسے عناصر کے بارے میں اطلاع فوری طور پرقریبی رینجر ز چیک پوسٹ، رینجرز ہیلپ لائن 1101 یا رینجرز مددگار واٹس ایپ نمبر03479001111پر کال یا ایس ایم ایس کے ذریعے دیں، آپ کا نام صیغہ راز میں رکھا جائے گا۔

The post کراچی میں رینجرز اور پولیس کی مشترکہ کارروائی، چوری اور ڈکیتی میں ملوث 2 ملزمان گرفتار appeared first on .