صنعتوں کا فروغ ملکی اقتصادی صورتحال کیلئے حوصلہ افزائی ہے، گورنر سندھ

گورنر سندھ عمران اسماعیل کا کہنا ہے کہ صنعتوں کا فروغ ملکی اقتصادی صورتحال کیلئے حوصلہ افزائی ہے۔

تفصیلات کے مطابق گورنر سندھ عمران اسماعیل سے وفاقی وزیرِ صنعت و پیداوار مخدوم خسرو بختیار کی گورنر ہاؤس میں ملاقات ہوئی جس میں انہوں نے انڈسٹریل زونز کی تعمیر و ترقی اور پاکستان اسٹیل مل کے حوالے سے معاملات سمیت باہمی دلچسپی کے دیگر امور پر تبادلہ خیال کیا۔

عمران اسماعیل نے کہا ہے کہ انڈسٹریل زونز کی تعمیر و ترقی سے منسلک اقدامات سے معیشت مزید مستحکم ہو گی، کراچی میں روزگار کے لیے افرادی قوت کی صنعتوں تک آسان رسائی کے ضمن میں اقدامات خوش آئند ہیں۔

دوسری جانب وفاقی وزیرِ صنعت و پیداوار مخدوم خسرو بختیار کا کہنا ہے کہ چھوٹے و درمیانے درجے کے کاروبار کو بڑھانے کے لیے ترجیحی خطوط پراقدامات کیے جا رہے ہیں، نئی ایس ایم ای پالیسی کاروباری نمو کو فروغ دے گی۔

انہوں نے کہا ہے کہ صنعتی عمل سے وابستہ کاروباری برادری کے لئے ہر ممکنہ سہولیات فراہم کر رہے ہیں، ایکسپورٹ پروسیسنگ زونز سے متعلق تمام ایشوز حل کر لئے ہیں اور جلد وفاقی کابینہ میں منظوری کے لئے پیش کیا جائے گا۔

وفاقی وزیرِ صنعت و پیداوار مخدوم خسرو بختیار نے مزید کہا کہ اسٹیل ملز کی حدود میں 1500 ایکڑ پر انڈسٹریل پارک اور ایکسپورٹ پروسیسنگ زون تعمیر کر رہے ہیں، ویلیو ایڈڈ برآمدات سے منسلک صنعتوں کو فروغ دینے کیلئے حکومت ترجیحی بنیادوں پر اقدامات اٹھا رہی ہے۔

The post صنعتوں کا فروغ ملکی اقتصادی صورتحال کیلئے حوصلہ افزائی ہے، گورنر سندھ appeared first on .