حمزہ علی عباسی نے عمران خان کے بیان کی وضاحت کردی

معروف پاکستانی اداکار حمزہ علی عباسی نے وزیرِاعظم عمران خان کے بیان پر قرآن اور سنت کی روشنی میں اپنے خیالات کا اظہار کرتے ہوئے کہا کہ انہوں یہ بات مخصوص سیاق و سباق کے حوالے سے کی جوکہ بالکل درست ہے۔

اداکار نے اپنے ایک حالیہ انٹرویو میں وزیرِاعظم کے خواتین کے لباس کے بارے میں دیئے گئے بیان پر کہا کہ قرآن مجید کے مطابق اس حوالے سے مردوں اور عورتوں دونوں کے لئے الگ احکامات ہیں۔

انہوں نے کہا کہ مردوں کے لئے قرآن میں احکامات ہیں کہ عورت نے جو مرضی پہنا ہو یا وہ جو بھی کر رہی ہے لیکن مرد نے اپنی آنکھ کا حساب دینا ہے اور اپنے روّیے کا حساب دینا ہے۔

حمزہ علی عباسی نے کہا کہ اسی طرح ایک مسلمان خاتون کو بھی صرف اپنی حیا، اپنی آنکھوں کا، اپنے روّیے، اپنے رہن سہن اور لباس کا حساب دینا ہے۔

انہوں نے کہا کہ اس سے یہ بات واضح ہے کہ مردوں کا اپنا حساب ہوگا یہ بات کہنا قرآن کے احکامات کے خلاف ہے، مرد بے راہ روی کا شکار اس لئے ہو رہے ہیں کیونکہ میرے اردگرد معاشرہ خراب ہے، اس طرح کی وجوہات بیان کرنے سے آخرت میں مرد کو اس کے گناہوں کی معافی نہیں ملے گی۔

حمزہ علی عباسی کا کہنا تھا کہ اسی طرح کوئی خاتون بھی اللّٰہ کے احکامات پر عمل پیرا نہ ہونے پر اس طرح کی وجوہات نہیں دے سکتی کہ وہ جو کچھ کر رہی ہے وہ اس لئے کر رہی ہے کہ معاشرہ خراب ہے، سب کو اپنا حساب دینا ہے۔

انہوں نے کہا کہ اگر یہاں پر عمران خان کے بیان کے بارے میں بات کریں تو انہوں نے یہ بات مخصوص سیاق و سباق کے حوالے سے کی جوکہ بالکل درست ہے۔

حمزہ علی نے کہا کہ آپ عمران خان کا پورا انٹرویو سنیں انہوں نے جس پسِ منظر میں یہ بات کی وہ بالکل ٹھیک ہے، ہم صرف ایک لائن پر اٹھا لیتے ہیں۔

حمزہ علی عباسی نے اپنی بات کا اختتام کرتے ہوئے کہا کہ وہ ہرگز وزیراعظم کی بات کا دفاع نہیں کر رہے لیکن انہوں نے جس پس منظر میں یہ بات کی وہ حقیقت ہے لیکن اس کا یہ مطلب بھی نہیں کہ کسی معاشرے میں نائٹ کلبز کا موجود ہونا اچھی بات ہے یا ایسی جگہوں کی معاشرے میں غیر موجودگی کے باعث جنسی جرائم کرنا جائز ہیں۔

The post حمزہ علی عباسی نے عمران خان کے بیان کی وضاحت کردی appeared first on .