پاکستان اسپورٹس بورڈ کی کارکردگی اچھی ہوتی تو ہم نے میڈل حاصل کرلیے ہوتے، عارف حسن

صدر پاکستان اولمپکس ایسوسی ایشن عارف حسن نے پاکستان اسپورٹس بورڈ کی کارکردگی پر تشویش کا اظہار کرتے ہوئے کہا ہے کہ اگر پاکستان اسپورٹس بورڈ کی کارکردگی اچھی ہوتی تو ہم نے میڈل حاصل کرلیے ہوتے۔

تفصیلات کے مطابق ایک انٹرویومیں پاکستان کی اولمپکس میں میڈل سے محرومی کے حوالے سے سوال کے جواب میں صدر پاکستان اولمپکس ایسوسی ایشن عارف حسن نے کہاکہ ہم نے ماضی میں ہاکی کے علاوہ کسی بھی کھیل پر اتنی توجہ نہیں دی تھی اور ہمارے زیادہ تر میڈلز ہاکی کے ہی ہوتے تھے،اور کوئی انفرادی شراکت نہیں ہوتی تھی۔

ان کا  کہنا تھا کہ میں نے ہمیشہ اس پر آواز اٹھائی ہے کہ ہاکی کےعلاوہ تمام دیگر کھیل کو نظر انداز کیا جارہا ہے، ابھی تک ہم اسے نظر انداز کر رہے ہیں۔

انٹرویو کے دوران کھلاڑیوں کے فضائی سفر کے لیے ٹکٹ کے حوالے سے سوال کے جواب میں ان کا کہنا تھا کہ پاکستان اسپورٹس بورڈ ٹکٹ کے انتظامات کرتا رہا ہے تاہم ڈیڈ لائن تک انتظامات نہیں کیے گئے تھے جس کی وجہ سے ہم نے اپنی طرف سے کھلاڑیوں کی بکنگ کروائی اور ایک ہفتے قبل ہمیں کہا گیا کہ آپ ٹکٹ کینسل کردیں جو ممکن نہیں تھا۔

عارف حسن کا کہنا تھا کہ ہمیں پاکستان اسپورٹس بورڈ سے کوئی گرانٹ نہیں ملتی اور نہ ہی ہم اس کا مطالبہ کرتے ہیں جبکہ پوری دنیا میں حکومت کھلاڑیوں کو فنڈ کرتی ہے۔

صدر پاکستان اولمپکس ایسوسی ایشن عارف حسن  کا مزید کہنا تھا لوگوں کو تحقیق کرلینی چاہیے کہ کس کی کیا ذمہ داری ہے، انہوں نے کہاکہ یہ سب جھوٹی خبریں ہیں، نام اولمپکس رکھا گیا ہے اور اولمپکس ہورہے ہیں تو ساری ذمہ داری ہم پر ڈال دی گئی ہے۔

The post  پاکستان اسپورٹس بورڈ کی کارکردگی اچھی ہوتی تو ہم نے میڈل حاصل کرلیے ہوتے، عارف حسن appeared first on .