ہوائی فائرنگ، دلہن کا شادی سے انکار

بھارت میں شادی کے دوران مضحکہ خیز واقعات کی اکثر ویڈیو سامنے آتی رہتی ہیں جس میں کبھی دلہن شادی سے انکار کردیتی ہے تو کبھی دلہا شادی سے فرار ہوجاتا ہے۔

غیر ملکی میڈیا کے مطابق اسی طرح کا ایک واقعہ بھارتی ریاست اترپردیش کے ضلع میرٹھ میں پیش آیا، دلہا کے مہمانوں کی جانب سے جشن منانے کے دوران فائرنگ کی گئی جس کے نتیجے میں دلہن کے چچا زخمی ہوگئے۔

فائرنگ سے چچا کے زخمی ہونے پر 22 سالہ دلہن ارم نے شہزاد نامی دلہا کے ساتھ شادی سے انکار کردیا۔

دلہن نے کہا کہ میں اس شخص سے شادی کیسے کرسکتی ہوں، باراتیوں نے میرے خاندان کے ساتھ اس طرح کا برتاؤ کیا جب میں ان کے ساتھ جاؤں گی تو یہ میرے ساتھ کیسا رویہ اختیار کریں گے۔

ارم کے شادی سے انکار کے بعد اس کے گھر والوں نے دلہا کی گاڑی توڑ دی، دلہا کے رشتے داروں کی پٹائی کی اور انہیں کچھ دیر کے لئے یرغمال بنالیا۔

بعدازاں پولیس نے موقع پر پہنچ کر صورت حال پر قابو پایا اور واقعے کا مقدمہ درج کرلیا۔

پولیس کا کہنا ہے کہ فائرنگ کرنے والوں کی شناخت کے لئے تقریب کی ویڈیو فوٹیج حاصل کی جارہی ہے، دلہا شہزاد، اس کے بھائی پپو اور سانو کے خلاف مقدمہ درج کیا گیا ہے۔

پولیس کا کہنا ہے کہ اگر لائسنس یافتہ اسلحے سے فائرنگ کی گئی ہے تو اسلحہ لائسنس کی منسوخی کی رپورٹ بھیجی جائے گی۔

پولیس کا کہنا ہے کہ خاتون کے چچا کو اسپتال منتقل کردیا گیا ہے جہاں ان کی حالت خطرے سے باہر بتائی گئی ہے۔

The post ہوائی فائرنگ، دلہن کا شادی سے انکار appeared first on .