کورونا سے بچاؤ کے لئے ویکسین لگوانا سب سے موثر ہے، عثمان بزدار

وزیراعلی پنجاب سردار عثمان بزدار کہتے ہیں کہ پنجاب حکومت شہریوں کو کورونا کی چوتھی لہر سے بچانے کے لئے ہر ممکن اقدامات اٹھا رہی ہے۔

 ان کا کہنا ہے کہ کورونا سے بچاؤ کے لئے ویکسین لگوانا سب سے موثر ہے جبکہ ایس او پیز پر عمل کر کے  شہری نہ صرف خود کورونا سے محفوظ رہ سکتے ہیں بلکہ دوسروں کو بھی محفوظ بنا سکتے ہیں۔

عثمان بزدار کا کہنا تھا کہ حکومتی ہدایات پر عملدرآمد کرنا شہریوں کے مفاد میں ہے جبکہ کورونا کی چوتھی لہر کے باعث مریضوں کی تعداد میں اضافہ ہو رہا ہے۔

ان کا مزید کہنا تھا کہ خدانخواستہ مثبت کیسز کی شرح میں اضافہ ہوا تو ایک بار پھر اسمارٹ لاک ڈاؤن کرنا پڑسکتا ہے ، پابندیوں سے بچنے کے لئے شہریوں کو احتیاط کا دامن ہاتھ سے نہیں چھوڑنا چاہیے۔

عثمان بزدار نے عوام سے اپیل کی ہے کہ وہ ماسک کا استعمال کریں اورسماجی فاصلے برقرار رکھیں۔

ان کا کہنا ہے کہ  شہری کورونا ویکسینیشن مہم میں حکومت کا ساتھ دیں ، ہر ایک کو ذمہ داری کا مظاہرہ کرنا ہوگا کیونکہ عوام کی زندگیوں کے تحفظ کیلئے ہر ضروری اقدام اٹھایا جائے گا۔

The post کورونا سے بچاؤ کے لئے ویکسین لگوانا سب سے موثر ہے، عثمان بزدار appeared first on .