ڈی کوک نے بورڈ کی سرزنش کے بعد بالآخر گراؤنڈ میں گھٹنے ٹیک دیے

جنوبی افریقہ کے وکٹ کیپر کوئنٹن ڈی کوک نے بورڈ کی سرزنش کے بعد بالآخر گراؤنڈ میں گھٹنے ٹیک دیے

انٹرنیشنل کرکٹ کونسل(آئی سی سی) کی جانب سے سوشل میڈیا پر ویڈیو جاری کی گئی ہے جس میں جنوبی افریقہ کے وکٹ کیپر بلے باز کوئنٹن ڈی کوک نسل پرستی کے خلاف علامتی احتجاج کے طور پر گراؤنڈ میں گھٹنے ٹیکے ہوئے ہیں۔

United against racism

Quinton de Kock joins his South African teammates in taking a knee ahead of today's match.#T20WorldCup | #SAvSL https://t.co/4BTlprC8KB

— ICC (@ICC) October 30, 2021

تفصیلات کے مطابق گزشتہ روز  شارجہ میں  سری لنکا سے ہونے والے ٹی ٹوئنٹی ورلڈ کپ کے میچ سے قبل دیگر جنوبی افریقی کھلاڑیوں کو بھی گراؤنڈ پر گھٹنے ٹیکے دیکھا جاسکتا ہے۔

خیال رہے کہ اس سے قبل ویسٹ انڈیز کے خلاف اہم میچ سے قبل کوئنٹن ڈی کوک نے گھٹنے پر بیٹھ کر نسلی تعصب کیخلاف احتجاج یا بلیک لائیوز میٹر کے حوالے سے یکجہتی کے اظہار سے انکار کر دیا تھا اور بورڈ کی ہدایت ماننے کے بجائے میچ سے ہی دستبردار ہوگئے تھے۔

کرکٹ جنوبی افریقہ نے اپنے کھلاڑیوں کو یہ ہدایت جاری کی تھی کہ میچ کے آغاز سے پہلے گھٹنے پر بیٹھ کر سیاہ فام افراد سے برتے جانے والے تعصب کیخلاف احتجاج ریکارڈ کرائیں۔

کرکٹ جنوبی افریقہ کا کہنا تھا کہ جنوبی افریقا کی تاریخ کو دیکھتے ہوئے ٹیم کے لیے یہ ضروری ہے کہ وہ نسل پرستی کے خلاف متحد اور مستقل مؤقف اختیار کرے۔

بعد ازاں ڈی کوک نے اپنے رویے پر معافی مانگ لی تھی۔

 اپنے بیان میں ڈی کوک کا کہنا تھا کہ میں اپنی ٹیم کے ساتھیوں اور مداحوں سے معافی چاہتا ہوں، اگر میرے گھٹنے ٹیکنے سے دوسروں کو تعلیم دینے میں مدد ملتی ہے اور دوسروں کی زندگیوں میں بہتری آتی ہے تو میں ایسا کرنے میں خوشی محسوس کروں گا۔

ڈی کوک کا کہنا تھا کہ میں نسل پرستی کے خلاف کھڑا ہونے کی اہمیت اور مثال قائم کرنے کے لیے کھلاڑیوں کی ذمہ داریوں کو سمجھتا ہوں مگر ویسٹ انڈیز کیخلاف میچ میں گھٹنے نہیں ٹیکے تو اس کا مطلب یہ نہیں کہ میں نے کسی کو عزت نہیں دی۔

گھٹنے کے بل بیٹھنے کے بارے میں ہمیں میچ کی صبح اس وقت بتایا گیا جب ہم کھیلنے جارہے تھے۔

The post ڈی کوک نے بورڈ کی سرزنش کے بعد بالآخر گراؤنڈ میں گھٹنے ٹیک دیے appeared first on .