ملک میں تاریخ کی بدترین مہنگائی، پیپلز پارٹی حکومت کے خلاف سڑکوں پر نکل آئی

ملک میں تاریخ کی بدترین مہنگائی ہونے کی وجہ سے پاکستان پیپلز پارٹی وفاقی حکومت کے خلاف سڑکوں پر نکل آئی ہے۔

تفصیلات کے مطابق مہنگائی کے خلاف پیپلز پارٹی کے تحت کراچی سمیت سندھ بھر میں احتجاجی مظاہرے جاری ہیں، مہنگائی کے خلاف احتجاجی مظاہروں میں کراچی کے 6 مختلف مقامات پر پیپلز پارٹی کی مرکزی و صوبائی قائدین سمیت صوبائی وزراء نے شرکت کی۔

ذرائع کا کہنا ہے کہ ریگل چوک صدر میں پیپلز پارٹی کا مہنگائی کے خلاف احتجاجی مظاہرے کی وجہ سے پریڈی اسٹریٹ کو عام ٹریفک کے ساتھ بند کردیا گیا، جبکہ پریڈی اسٹریٹ کی دوکانیں بھی بند کردی گئی ہیں، سیکیورٹی کے لئے پولیس تعنیات ہے۔

ذرائع کے مطابق احتجاجی مظاہرے میں کارکنان سے پیپلز پارٹی کی مرکزی رہنما سینٹر شیری رحمان اور وقار مہدی خطاب کریں گے، الاصف اسکوائر پر بھی مہنگائی کے خلاف احتجاج جاری ہے، الاصف اسکوائر پر سلیم مانڈوی والے کارکنوں سے خطاب کریں گے۔

ذرائع کا کہنا ہے کہ کراچی کے ڈسٹرکٹ ویسٹ میں بنارس چوک پر پیپلز پارٹی کی جانب سے احتجاج کیا جارہا ہے، بنارس چاک پر جاری احتجاج سے  مرتضیٰ وہاب خطاب کریں گے۔

ذرائع کے مطابق کراچی کے ڈسٹرکٹ ملیر میں ملیر پریس کلب کے باہر سید قائم علی شاہ کارکنوں کا لہو گرمائیں گے، ڈسٹرکٹ سینٹرل میں لیاقت آباد 10 نمبر پر پیپلز پارٹی کے کارکنان جمع ہونا شروع ہوگئے ہیں، لیاقت آباد 10 نمبر پر مہنگائی کے خلاف احتجاج کی قیادت شہلا رضا کر رہی ہیں۔

ذرائع کا کہنا ہے کہ ڈسٹرکٹ کورنگی میں سنگر چورنگی  پر احتجاجی مظاہرہ  جاری ہے جس میں تاج حیدر خطاب کریں گے۔

The post ملک میں تاریخ کی بدترین مہنگائی، پیپلز پارٹی حکومت کے خلاف سڑکوں پر نکل آئی appeared first on .