ہم نے سعودی عرب کے ساتھ عید منانے کی تجویز دی تھی ، نورالحق قادری

وفاقی وزیر برائے مذہبی امور نورالحق قادری نے کہا ہے کہ ہم نے سعودی عرب کے ساتھ عید منانے کی تجویز دی تھی۔

تفصیلات کے مطابق سینیٹ کی قائمہ کمیٹی برائے مذہبی امور کا اجلاس چیئرمین قائمہ کمیٹی سینیٹر مولانا عبدالغفور حیدری کی زیر صدارت ہوا جس میں رویت ہلال کمیٹی اور نجی رویت کمیٹیوں کا معاملہ زیر غور آیا۔

چیئرمین کمیٹی مولانا عبدالغفور حیدری نے کہا کہ  جب پوری دنیا میں ایک دن عید اور روزہ ہوتا ہے تو یہاں کیوں نہیں ہوتا؟

وفاقی وزیر برائے مذہبی امور نورالحق قادری نے کہا کہ مفتی منیب الرحمان اور مفتی شہاب الدین کی دو ملاقاتیں کروائیں مگر نتیجہ کچھ نہ نکلا ، موجودہ رویت ہلال کمیٹی کی بھی مفتی شہاب الدین سے ملاقاتیں کروائی ہیں مگر ابھی تک تو کوئی نتیجہ نہیں نکلا ، ہم نے تو سعودی عرب کے ساتھ عید منانے کی تجویز دی تھی۔

 نورالحق قادری نے کہا کہ بریلوی اور شیعہ مسالک سعودی عرب کے ساتھ عید اور روزہ رکھنے کو تیار نہیں ، اہلحدیث مسلک سعودی عرب کے ساتھ عید اور روزہ رکھنے کو تیار ہیں ، دیوبند مکتبہ فکر آدھا سعودی عرب کے ساتھ روزہ اور عید کرنے کو تیار ہے آدھا تیار نہیں ، روزہ اور عید کا سب سے بڑا مسئلہ تو میرے لیے ہے ، میں وزیر ہوتے ہوئے سرکاری رویت ہلال کمیٹی کے اعلان کا انتظار کررہا تھا ، میرے گھر والوں نے روزہ رکھا ہوا تھا۔

وفاقی وزیر برائے مذہبی امور نورالحق قادری نے کہا کہ میری تو اب بھی تجویز ہے کہ سعودی عرب کے ساتھ روزہ اور عید کے لیے دونوں ممالک کے درمیان کوئی نظام بنا دیا جائے۔

The post ہم نے سعودی عرب کے ساتھ عید منانے کی تجویز دی تھی ، نورالحق قادری appeared first on .