محکمہ صنعت وتجارت نے پرائس کنٹرول مجسٹریٹس کی رپورٹ جاری کردی

محکمہ صنعت وتجارت کی جانب سے گرانفروشی کی روک تھام کے حوالے سے پرائس کنٹرول مجسٹریٹس کی کارکردگی کی رپورٹ جاری کردی گئی ہے۔

تفصیلات کے مطابق یکم جنوری 2019سے لے کر5 اکتوبر 2021تک پرائس کنٹرول مجسٹریٹس نے 33لاکھ 82ہزار 266چھاپے مارے ہیں، اس دوران 4لاکھ 48ہزار 770گرانفروشی، ذخیرہ اندوزی اور دیگر خلاف ورزیاں سامنے آئی ہیں۔

جاری کردہ رپورٹ میں بتایا گیا ہے کہ خلاف ورزیوں پر 34 کروڑ 22لاکھ 18ہزار 520روپے کے جرمانے عائد کیے گئے ہیں جبکہ 11ہزار 914مقدمات درج ہوئے اور 18ہزار 392افراد کو گرفتار کیا گیا ہے۔

رپورٹ کے مطابق یکم جون 2021ء سے لے کر 5اکتوبر 2021ء تک انسداد ذخیرہ اندوزی مہم کے دوران 333افراد ذخیر اندوزی میں ملوث پائے گئےہیں ، ذخیرہ اندوزوں پر 77لاکھ 7ہزار 500روپے کے جرمانے عائد کیے گئے ہیں۔

اسکے علاوہ 5مقدمات درج ہوئے اور 49گودام بھی سیل کردیے گئے ہیں۔

جاری مہم کے دوران ذخیر اندوزوں سے چینی اور چاول کے لاکھوں تھیلے، 82ہزار 450کلو گرام گھی، 30ہزار 681 گندم کے تھیلے،12ہزار  604آٹے کے تھیلے، 1لاکھ 23ہزار 543لیٹرکوکنگ آئل اور 4ہزار 396کلوگرام دالیں بھی برآمد کر لی گئی ہیں۔

صوبائی وزیر صنعت وتجارت میں اسلم اقبال نے گرانفروشوں اور ذخیر اندوزوں کے خلاف جاری مہم کو تیز کرنے کا حکم دے دیا  ہے اور کہا ہے کہ چند ٹکوں کی خاطر عام آدمی کی مشکلات بڑھانے والے کسی رعایت کے مستحق نہیں ہیں۔

 میاں اسلم اقبال نے کہا کہ منڈی میں نیلامی کے عمل سے لے کر عام مارکیٹوں میں اشیاء ضروریات کی فروخت پر کڑی نظر رکھی جائے، گرانفروشی اور ذخیر اندوزی کی روک تھام ذمے داری ہی نہیں بلکہ عوامی خدمت بھی ہے۔

انہوں نے مزید کہا کہ متعلقہ افسران دفاتر سے نکل کر فیلڈ میں جائیں اور عوام کو ریلیف دیں۔

The post محکمہ صنعت وتجارت نے پرائس کنٹرول مجسٹریٹس کی رپورٹ جاری کردی appeared first on .