عمران خان نے عون چوہدری کو زمین سے اٹھا کر آسمان پر پہنچایا، فیاض الحسن چوہان

وزیر جیل خانہ جات پنجاب فیاض الحسن چوہان نے کہا ہے کہ وزیراعظم عمران خان نے عون چوہدری کو زمین سے اٹھا کر آسمان پر پہنچایا ہے۔

تفصیلات کے مطابق وزیر جیل خانہ جات پنجاب فیاض الحسن چوہان نے  اپنے ایک بیان میں عون چوہدری کے استعفیٰ پر ردعمل دیتے ہوئے کہا کہ عون چوہدری اور راجہ ریاض کے پارٹی مخالف بیانات پر انہیں ڈھٹائی کی بجائے شرمندہ ہونا چاہیئے۔

ان کا  کہنا تھا کہ مناسب ہوتا کہ عون چوہدری ہیرو گیری کرنے کی بجائے وزیراعظم عمران خان کے احسان مند ہوتے۔

فیاض الحسن چوہان کا کہنا  تھا کہ پی ٹی آئی سے نسبت پر عوام نے عون چوہدری اور ترین گروپ کو ووٹ ڈالے،ان کی اتنی اوقات نہیں تھی کہ اپنے بل بوتے پر عوام کے نمائندہ منتخب ہوتے۔

وزیر جیل خانہ جات پنجاب  کا کہنا تھا کہ میں دعوے سے کہتا ہوں کہ راجہ ریاض ابھی مستعفی ہو کر اپنی ساکھ پر دوبارہ منتخب نہیں ہو سکتے،ہمت ہے تو راجہ ریاض میرا یہ کھلا چیلنج قبول کر کے دکھائیں۔

 فیاض الحسن چوہان  کا مزید کہنا تھا کہ پاکستان تحریک انصاف میں صرف ایک گروپ ہے اور وہ وزیراعظم عمران خان گروپ ہے، کسی قسم کی دھڑہ بازی اور پارٹی کو تقسیم کرنے کی کوئی سازش ناقابل برداشت ہے۔

The post عمران خان نے عون چوہدری کو زمین سے اٹھا کر آسمان پر پہنچایا، فیاض الحسن چوہان appeared first on .