مذہبی رواداری ہمارے خطے کی روایتوں کا حصہ ہے،بلاول بھٹو

پاکستان پیپلزپارٹی کے چیئرمین بلاول بھٹو زرداری نے کہا ہے کہ مذہبی رواداری ہمارے خطے کی روایتوں کا حصہ ہے، عدم برداشت کے مظاہرے ہماری تہذیب کے منافی ہیں۔

تفصیلات کے مطابق چیئرمین پیپلز پارٹی بلاول بھٹو زرداری نے رحیم یار خان میں ہندو برادری کے مندر میں تخریب کاری کرنے والے عناصر کے عمل کی مذمت کرتے ہوئے کہا کہ اقلیتوں کا تحفظ ریاست کی بنیادی ذمہ داری ہے، جب انتہا پسند مندر پر حملے کررہے تھے تو انتظامیہ کہیں نظر نہیں آئی۔

انہوں نے کہا کہ ہندو برادری کے افراد کو اپنی عبادت گاہ کی توہین سے نہ صرف ٹھیس پہنچی بلکہ عدم تحفظ کے احساس میں بھی اضافہ ہوا، اگر ہم ملک میں آباد چند فیصد اقلیتی برادری کو تحفظ کا احساس نہیں دے سکتے تو یہ اکثریتی آبادی کے لئے لمحہ فکریہ ہے۔

چیئرمین بلاول بھٹو زرداری کا کہنا تھا کہ انتہاپسندوں نے بھونگ میں مندر کو نقصان پہنچا کر قومی پرچم میں اقلیتوں کی نمائندگی کرتے سفید حصے کی بھی توہین کی ہے، انتظامیہ وسیب میں ہوئے دل دہلا دینے والے افسوس ناک سانحے کے ذمہ داران کو پکڑ کر انہیں عبرت کا نشان بنائے۔

The post مذہبی رواداری ہمارے خطے کی روایتوں کا حصہ ہے،بلاول بھٹو appeared first on .