حکومت ملازمین کو بہترین رہائشی سہولتیں فراہم کرنے کی پالیسی پر کار بند ہے، وزیر اعظم

وزیر اعظم عمران خان نے کہا ہے کہ حکومت پبلک سیکٹر ملازمین کو بہترین رہائشی سہولتیں فراہم کرنے کی پالیسی پر کار بند ہے۔

تفصیلات کے مطابق وزیر اعظم عمران خان کی زیرِ صدارت پاکستان پبلک ورکس ڈیپارٹمنٹ سے متعلق امور پر جائزہ اجلاس ہوا جس میں وزیر اعظم نے کہا کہ پی ڈبلیو ڈی کو ایک سمارٹ اور موثر تنظیم میں تبدیل کیا جارہا ہے، حکومت پبلک سیکٹر ملازمین کو بہترین رہائشی سہولتیں فراہم کرنے کی پالیسی پر کار بند ہے۔

وزیر اعظم نے متعلقہ حکام کو ہدایت کی کہ وہ وفاقی حکومت کے تمام ہاؤسنگ یونٹس کی مناسب دیکھ بھال کو یقینی بنائیں، انہوں نے یہ بھی ہدایت کی کہ نئے عمودی ہاؤسنگ یونٹس کی تعمیر کے لیے ضروری قوانین کو جلد از جلد نافذ کیا جائے۔

 وزیر اعظم عمران خان نے کہا کہ وفاقی حکومت کے ملازمین کے لیے بہترین معیار کے رہائشی یونٹس کی فراہمی کو یقینی بنانے کے لیے تمام ممکنہ اقدامات کو بروئے کار لایا جائے۔

اجلاس میں وزیر ہاؤسنگ چوہدری طارق بشیر چیمہ، وزیر منصوبہ بندی اسد عمر، مشیر خزانہ شوکت فیاض ترین، پارلیمانی سیکرٹری ہاؤسنگ مسز تاشفین صفدر نے شرکت کی۔

چیئرمین نیا پاکستان ہاؤسنگ اینڈ ڈویلپمنٹ اتھارٹی لیفٹیننٹ جنرل انور علی حیدر (ر) اور متعلقہ سینئر افسران بھی اس موقع پر موجود تھے۔

The post حکومت ملازمین کو بہترین رہائشی سہولتیں فراہم کرنے کی پالیسی پر کار بند ہے، وزیر اعظم appeared first on .