مختلف سیکٹرز میں سرمایہ کاری کے مواقعوں کو ڈاکومنٹریز کے ذریعے اجاگر کیا جائے گا، اسلم اقبال

صوبائی وزیر صنعت و تجارت میاں اسلم اقبال کا کہنا ہے کہ مختلف سیکٹرز میں سرمایہ کاری کے مواقعوں کو ڈاکومنٹریز کے ذریعے اجاگر کیا جائے گا۔

تفصیلات کے مطابق صوبائی وزیر صنعت و تجارت میاں اسلم اقبال کی زیر صدارت دوبئی ایکسپو کے حوالے سے اسٹیرنگ کمیٹی کا چھٹا اجلاس ہوا۔

سول سیکرٹریٹ میں منعقدہ اجلاس میں چیف سیکرٹری کامران علی افضل، صنعت و تجارت اور اطلاعات و ثقافت کے سیکرٹریز، پنجاب سرمایہ کاری بورڈ کے ڈائریکٹرز اور متعلقہ محکموں کے افسران نے شرکت کی۔

اجلاس میں سی ای او پنجاب سرمایہ کاری بورڈ ڈاکٹر ارفع اقبال کی دوبئی ایکسپو میں محکموں کی شرکت کے حوالے سے تیاریوں کے بارے میں بریفنگ دی گئی۔

اس کے علاوہ اجلاس میں ایڈوانس ٹیم کے دوبئی ایکسپو کے دورے کی رپورٹ بھی پیش کی گئی۔

صوبائی وزیر نے کہا کہ دوبئی ایکسپو کے ذریعے عالمی سرمایہ کاروں کو پنجاب کے سرمایہ کار دوست ماحول سے آگاہ کیا جائے گا، دوبئی ایکسپو میں انٹرنیشنل بزنس کانفرنس میں ملکی اور غیر ملکی سرمایہ کار شرکت کریں گے، صوبے کے تمام چیمبرز کی بھی بھرپور نمائندگی ہوگی۔

میاں اسلم اقبال نے مزید کہا کہ مختلف سیکٹرز میں سرمایہ کاری کے مواقعوں کو ڈاکومنٹریز کے ذریعے اجاگر کیا جائے گا، دوبئی ایکسپو کے انٹرنیشنل ایونٹ کو سرمایہ کاری کے فروغ کے حوالے سے نتیجہ خیز بنایا جائے گا۔

صوبائی وزیر صنعت و تجارت میاں اسلم اقبال نے ہدایت دی کہ دوبئی ایکسپو کے ایونٹس میں شرکت کیلئے سرکاری محکمے تیزی سے اقدامات کریں۔

The post مختلف سیکٹرز میں سرمایہ کاری کے مواقعوں کو ڈاکومنٹریز کے ذریعے اجاگر کیا جائے گا، اسلم اقبال appeared first on .