تعلیمی اداروں میں موسم سرما کے اوقات کار جاری

وفاقی نظامت تعلیمات نے اسلام آباد کے تعلیمی اداروں میں موسم سرما کے اوقات کار جاری کر دئیے ہیں۔

وفاقی نظامت تعلیمات کی جانب سے جاری کر دہ نو ٹی فکیشن کے مطابق مارننگ شفٹ کے اوقات کار 8:30 سے 2:00 تک ہونگے جبکہ جمعہ کے روز اوقات کار 8:30 سے 12:30 تک ہونگے۔

جاری کردہ نوٹی فکیشن کے مطابق ڈبل شفٹ کے تعلیمی اداروں میں اوقات کار 8:30 سے 1:30 بجے تک ہونگے، مارننگ شفٹ کے اوقات کار 8:30 سے 1:30 بجےجبکہ ایوننگ شفٹ کے اوقات کار1:30 سے 6:30 بجے تک ہونگے۔

 وفاقی نظامت تعلیمات کے مطابق جمعہ کے روز ایوننگ شفٹ کی ٹائمنگ 2:30 سے 6:30 بجے تک ہوگی جبکہ مونٹیسری اور پریپ کلاس کے اوقات کار 8:30 سے 12:30 بجے کلاسز ہونگی۔

ذرائع کے مطابق وفاقی سرکاری تعلیمی اداروں میں ہفتہ کی چھٹی بحال کر دی گئی ، کورونا کے باعث تعلیمی اداروں میں چھ دن کلاسز شروع کی گئی تھیں۔

وفاقی نظامت تعلیمات کی جانب سے جاری کر دہ نو ٹی فکیشن کے مطابق تعلیمی اداروں میں اب سوموار سے جمعہ تک کلاسز ہوں گی۔

ڈائریکٹر ایف ڈی ای سعدیہ عدنان کا کہنا ہےکہ 100 فیصد حاضری کے ساتھ پانچ دن کلاسز ہوں گی۔

واضح رہے کہ گزشتہ ہفتے کورونا وبا کے پھیلاؤ میں کمی کے باعث ملک بھر کے تعلیمی ادارے  سو فیصد حاضری کے ساتھ کھل گئے ہیں۔

 وفاقی وزیر تعلیم شفقت محمود نے گزشتہ ماہ سولہ ستمبر سے تعلیمی ادارے 50 فیصد حاضری کے ساتھ کھولنے کا اعلان کیا تھا اور روزانہ کی بنیاد پر این سی او سی میں بیماری کا باریک بینی سے جائزہ لینے کے بعد مزید فیصلوں کا کہا تھا۔

ذرائع کے مطابق ملک بھر میں سو فیصد حاضری کے ساتھ کلاسز کا آغاز ہوگیا ہے، 12 سال اور زائد عمر کے طلبا کیلئے ویکسی نیشن بھی لازمی قرار دے دی گئی ہے۔

نیشنل کمانڈ اینڈ آپریشن سینٹر(این سی او سی) نے کورونا کیسز کم ہونے پر تمام تعلیمی اداروں کو ہفتے میں 6 دن مکمل حاضری کے ساتھ کھولنے کا اعلان کیا تھا۔

کورونا وائرس کی چوتھی لہر کے دوران کیسز میں کمی کے بعد این سی او سی کے فیصلے کے مطابق محکمہ تعلیم سندھ نے بھی آج سے سو فیصد حاضری کے ساتھ اسکول کھولنے کی اجازت دے دی ہے۔

سندھ کے تعلیمی اداروں میں بھی  بارہ سال کے بچوں سمیت تمام اسٹاف کی ویکسی نیشن کو لازمی قرار دیا گیاہے۔

اس کے علاوہ پنجاب ، بلوچستان اور کے پی کے تعلیمی اداروں میں بھی معمول کے مطابق پوری حاضری کے ساتھ کلاسز کا اغاز کردیا گیا ہے۔

The post تعلیمی اداروں میں موسم سرما کے اوقات کار جاری appeared first on .