سردار سکندر حیات نے ہمیشہ حق کی سیاست کا علم بلند رکھا، فواد چوہدری

وفاقی وزیر اطلاعات فواد چوہدری نے کہا ہے کہ سردار سکندر حیات نے ہمیشہ اصول پرستی اور حق کی سیاست کا علم بلند رکھا۔

تفصیلات کے مطابق اپنے ایک بیان میں وفاقی وزیر اطلاعات چوہدری فواد چودھری نے سابق وزیر اعظم آزاد کشمیر سردار سکندر حیات خان کے انتقال پر دکھ کا اظہار کیا ہے۔

فواد چوہدری نے کہا کہ سردار سکندر حیات نے بطور وزیر اعظم اور صدر آزاد کشمیر جموں کشمیر کے حق اور بھارت کے ریاستی بربریت کے خلاف آواز بلند کی۔

اپنے بیان میں وفاقی وزیر اطلاعات فواد چوہدری  نے مزید کہا کہ سردار سکندر حیات نے ہمیشہ اصول پرستی اور حق کی سیاست کا علم بلند رکھا، اللہ تعالیٰ مرحوم کے درجات بلند فرمائے آمین۔

دوسری جانب  صدر پاکستان تحریک انصاف آزاد کشمیر سردار تنویر الیاس نے سابق وزیر اعظم آزاد کشمیر کی وفات پر افسوس  کا اظہار  کرتے ہوئے  کہا کہ اللہ تعالی مرحوم کے درجات بلند فرمائے اور انہیں جنت الفردوس میں جگہ عطا فرمائے، سردار سکندر حیات کی تحریک آزادی کیلئے خدمات کو ہمیشہ یاد رکھا جائے گا۔

صدر پاکستان تحریک انصاف آزاد کشمیر نے کہا کہ سردار سکندر حیات خان کی وفات سے پیدا ہونے والا خلاء صدیوں بعد بھی پر نہیں ہو سکتا۔

سردار تنویر الیاس کا کہنا تھا  کہ سردار سکندر حیات خان کی نا گہانی موت ایک عظیم سانحہ ہے، سردار سکندر حیات خان نے ریاست کے عوام کی جو خدمت کی وہ ناقابل فراموش ہے۔

صدر پاکستان تحریک انصاف آزاد کشمیر نے کہا کہ سردار سکندر حیات خان سالار جمہوریت آذاد کشمیر کے  قدآور سیاسی رہنماء تھے،انہوں نے حقیقی معنوں میں ریاست کی خدمت کی۔

 سردار تنویر الیاس کا یہ بھی کہنا تھا کہ سردار سکندر حیات خان کے  کوچ کر جانے سے ریاست ایک سائبان سے محروم ہو گئی، مرحوم کی ہمارے درمیان موجودگی ہماری خوش بختی تھی۔

  تنویر الیاس کا مزید کہنا تھا کہسردار سکندر حیات خان نے ملکی سلامتی اور عوامی خدمت میں منفرد کردا ادا کیا، سردار سکندر حیات خان کی خدمات کو پوری قوم انتہائی قدر کی نگاہ سے دیکھتی ہے۔

یاد رہے اس سے قبل   آزاد کشمیر کے سابق صدر اوروزیراعظم سردار سکندر حیات خان انتقال کر گئے۔

سردار سکندر حیات خان کچھ عرصے سے بیمار تھے، سکندر حیات حالیہ انختابات میں ن لیگ چھوڑکر مسلم کانفرنس میں شامل ہوئے تھے۔

واضح رہے کہ سردار سکندر حیات خان آزاد کشمیر کے صدر اور طویل ترین وزیر اعظم رہے ہیں اور انہیں سالار جمہوریت کہا جاتا ہے۔

 سردار سکندر حیات کی ولادت 1 جون 1934ء کو ڈومال راجپوت ذات کے سردار فتح محمد خان کریلوی کے گھر میں ہوئی۔ ان کا آبائی گاؤں کا نام کریلہ ضلع کوٹلی ہے۔

The post سردار سکندر حیات نے ہمیشہ حق کی سیاست کا علم بلند رکھا، فواد چوہدری appeared first on .