جماعت اسلامی کی ایک ہی ترجیح ہے جو کشمیر کی آزادی ہے، سراج الحق

امیر جماعت اسلامی سراج الحق نے کہا ہے کہ جماعت اسلامی کی ایک ہی ترجیح ہے جو کشمیر کی آزادی ہے۔

تفصیلات کے مطابق  امیر جماعت اسلامی سراج الحق نے اپنے ایک بیان میں کہا کہ کشمیر کی آزادی کا کئی بار موقع آیا جسے ہمارے حکمرانوں نے ضائع کردیا، کشمیر کی آزادی اور کشمیر کاز کو چھوڑنا پاکستان کے نظریہ کے ساتھ غداری ہے۔

امیر جماعت اسلامی کا کہنا تھا کہ آج تک آزادی کی شمع مقبوضہ کشمیر کے عوام کی وجہ سے روشن ہے، کشمیر کے لئے سیاسی اور سفارتی کے ساتھ عسکری جدوجہد بھی کرنا چاہیے۔

 سراج الحق کا یہ بھی کہنا تھا کہ یہ دنیا انقلابات سے بھری پڑی ہے، افغانستان دنیا کی سب سے بڑی فوج کو شکست دے سکتا ہے تو کشمیر میں کیا رکاوٹ ہے۔

 امیر جماعت اسلامی نے کہا کہ افغانستان کو آزادی اللہ پر توکل اور جہاد کے نتیجے میں ملی، جب تک قرآن مجید موجود ہے جو قیامت تک ہے تو جہاد کا پیغام رہے گا۔

 سراج الحق نے یہ بھی کہا کہ جدوجہد کا جذبہ سید علی گیلانی نے پیدا کیا۔ مقبوضہ کشمیر کے عوام نے بستیوں کی بجائے قبرستان آباد کئے، مقبوضہ کشمیر کے عوام نے موت قبول کی لیکن بھارتی فوج کے ہاتھوں خوراک یا دوائی قبول نہ کی۔

امیر جماعت اسلامی کا کہنا تھا کہ جماعت اسلامی بار بار پاکستان کی حکومت کو کہہ چکی کہ کشمیریوں کے حق دلانے کے لئے اقدام کرے، اقوام متحدہ کی تئیس قراردادیں استصواب رائے کے لئے موجود ہیں۔ آج کی حکومت پر واضح کرنا چاہتا ہوں جب تک کشمیر کا مسلہ حل نہ ہو خطہ معمول پر نہیں آسکتا۔

 سراج الحق نے کہا کہ پاکستان کی ہریالی کشمیر سے آنے والے دریاوں کے پانی سے ہے، پاکستان کو بچانا ہے تو مقبوضہ کشمیر کی آزادی کے لئے فیصلہ کن معرکہ لڑنا ہوگا۔

امیر جماعت اسلامی نے یہ بھی کہا کہ وزیراعظم نے آزادکشمیر انتخابات جاکر نئے آپشن کی بات کی یہ نئے آپشن بھارت کی خواہش ہے، آپشن ایک ہی ہے جو استصواب رائے ہے ورنہ اس جدوجہد کو سبوتاژ کرنا ہوگا۔

 سراج الحق کا کہنا تھا کہ جماعت اسلامی کی ایک ہی ترجیح ہے جو کشمیر کی آزادی ہے۔ کشمیر کے عوام بھی ہمارا ساتھ دیں گے، کشمیر کاز کو سبوتاژ کرنے کی اجازت نہیں دیں گے۔

امیر جماعت اسلامی سراج الحق کا مزید کہنا تھا کہ سید علی گیلانی نے اپنی آدھی زندگی جیلوں میں کاٹی ہے، وہ دن ضرور آئے گا جب سری نگر پر سبز ہلالی پرچم لہرایا جائے گا۔ آزادی کی کرنیں اور شمعیں روشن ہوں گی اور کشمیر ضرور پاکستان بنے گا۔

The post جماعت اسلامی کی ایک ہی ترجیح ہے جو کشمیر کی آزادی ہے، سراج الحق appeared first on .