اداکارہ مادھوری ڈکشٹ ’ویب ڈیبیو‘ کیلئے تیار

مشہور بالی ووڈ اداکارہ مادھوری ڈکشٹ ویب سیریز اور اسٹریمنگ سروسز کی روز بروز بڑھتی مقبولیت دیکھ کر ’ویب ڈیبیو‘ دینے کے لئے تیار ہیں۔

غیر ملکی خبر رساں ادارے کے مطابق مادھوری ڈکشٹ نے اپنے ایک انٹرویو میں اسٹریمنگ سروسز کے بارے میں بات کرتے ہوئے کہا کہ ’ڈیجیٹل پلیٹ فارم کہانیاں لکھنے اور ترتیب دینے والوں کو آزادی کا احساس دلاتا ہے جو کہ بڑی اسکرین نہیں دیتی ہے۔

انہوں نے کہا کہ ’پچھلے سال، جب لوگ گھر بیٹھے تھے، تو وہ صرف ڈیجیٹل پلیٹ فارم کے ذریعے انٹرٹینمنٹ حاصل کر رہے تھے، یہ لوگوں کو انتخاب کرنے کا موقع فراہم کرتا ہے کہ وہ اپنی خواہش کے مطابق جب بھی وہ چاہیں فلم ہو یا سیریز دیکھ سکتے ہیں، انٹرٹینمنٹ کے لئے آپ کو کہیں جانے کی ضرورت نہیں ہے۔‘

اداکارہ نے مزید کہا کہ آپ کو فلم بنانے میں رکاوٹوں کے بارے میں سوچنے کی ضرورت نہیں ہے کہ کیا یہ تمام ناظرین کو پسند آئے گی، کیا یہ فلم ہِٹ ہوگی،  یہ ساری مجبوریاں اسٹریمنگ سروسز پر موجود نہیں ہیں، لہٰذا آپ اپنی کہانیاں جس طرح آپ چاہتے ہیں بتا سکتے ہیں۔

جس سیریز میں اداکارہ اپنی اداکاری کے جوہر دکھانے والی ہیں اس کے بارے میں انہوں نے کہا کہ انہیں خوشی ہے کہ ان کو کردار اور مواد کو تخلیق کرنے کا تھوڑا وقت ملا ہے۔

تاہم مادھوری ڈکشٹ جس سیریز میں اداکاری کرنے جارہی ہیں اس کا نام یا مزید تفصیلات منظر عام پر نہیں آئیں۔

The post اداکارہ مادھوری ڈکشٹ ’ویب ڈیبیو‘ کیلئے تیار appeared first on .