افغانستان میں امن پاکستان کی اولین خواہش ہے، آرمی چیف

آرمی چیف جنرل قمر جاوید باجوہ نے کہا ہے کہ افغانستان میں امن پاکستان کی اولین خواہش ہے۔

پاک فوج کے شعبہ تعلقات عامہ (آئی ایس پی آر) کی جانب سے جاری کردہ بیان کے مطابق افغان میڈیا کے پندرہ رکنی وفد نے جی ایچ کیو کا دورہ کیا جہاں انہوں نے آرمی چیف جنرل قمر جاوید باجوہ سے ملاقات کی۔

آئی ایس پی آر کے مطابق آرمی چیف نے صحافیوں کے دورے کا انتظام کرنے پر پاک افغان یوتھ فورم کے اقدام کو سراہا۔

آرمی چیف جنرل قمر جاوید باجوہ نے کہا کہ امن خراب کرنے والوں کی نشاندہی کرنا میڈیا اور عوام کی ذمہ داری ہے، دونوں ملکوں کے عوام کے درمیان روابط، ثقافت کے فروغ کے لیے سازگار ماحول پیدا کرنے میں میڈیا پل کا کردار ادا کرسکتا ہے۔

جنرل قمر جاوید باجوہ نے یہ بھی کہا کہ افغانستان میں امن پاکستان کی اولین خواہش ہے کیونکہ دونوں ملکوں کا امن ایک دوسرے سے جڑا ہے۔ خرابی پیدا کرنے والے عناصر کو امن عمل کو نقصان پہنچانے کی ہرگز اجازت نہیں دیں گے۔

اس موقع پر آرمی چیف نے پاکستان کے جامع بارڈر مینجمنٹ نظام پر بھی گفتگو کی اور کہا کہ سرحدوں کی سیکیورٹی دونوں ملکوں کے بہترین مفاد میں ہے۔

آرمی چیف جنرل قمر جاوید باجوہ نے مزید کہا کہ افغانستان میں امن کی بحالی خطے کی پائیدار ترقی کے لیے ناگزیر ہے۔ امید ہے دونوں ممالک کے مابین مستقبل میں مزید دوروں کا تبادلہ ہوگا۔

آئی ایس پی آر کا کہنا ہے کہ ملاقات میں افغان صحافیوں نے تبادلہ خیال کا موقع دینے پر آرمی چیف سے اظہار تشکر کیا۔

ملاقات میں افغان میڈیا وفد نے کہا کہ افغان عوام کے لیے پاکستان کی مخلصی اور کاوشوں پر شکر گزار ہیں، پاکستان کا افغان مہاجرین کی میزبانی، امن عمل میں کردار قابل قدر ہے۔

The post افغانستان میں امن پاکستان کی اولین خواہش ہے، آرمی چیف appeared first on .