Zeal News Pakistan First Complete Media Group
اسلام آباد میں بےدردی سے قتل کی جانے والی 26 سالہ لڑکی نور مقدم کو انصاف دلانے کے لیے پاکستان شوبز انڈسٹری بھی میدان میں آگئی۔
پاکستان شوبز انڈسٹری کی اداکارہ ایمن خان، صبا قمر، بشریٰ انصاری سمیت دیگر فنکاروں نے اپنے سوشل میڈیا پیغامات میں نور قتل کیس کے مرکزی ملزم ظاہر جعفر کے لیے سخت سزا کا مطالبہ کیا ہے۔
اداکارہ بشریٰ انصاری نے فوٹو اینڈ ویڈیو شیئرنگ ایپ انسٹاگرام پوسٹ میں لکھا کہ وہ نور کے قتل کی مذمت کرنے کیلئے طاقت اور لفظ جمع کرنے سے قاصر ہیں، نور قتل کیس میں ہم اپنے دکھ کو بیان نہیں کرسکتے۔
View this post on Instagram
بشریٰ انصاری نے لکھا کہ مرد سمجھتے ہیں کہ عورت ان کی ملکیت ہے، بس یہی سوچ اور سوچنے کے اس زاویے کو بدلنے کی ضرورت ہے۔
اداکارہ نے مزید کہا کہ ملزم کی پوری فیملی جرم میں برابر کی شریک ہے کیونکہ انہوں نے ظاہر کو نور کو بےدردری سے قتل کرنے سے نہیں روکا، جبکہ وہ نور اور اس سے متعلق سب جانتے بھی تھے۔
اداکارہ بشریٰ نے لکھا کہ نور اس وقت چیخ چلّا رہی ہوگی لیکن وہاں کھڑے ملازم تماش بین بنے کھڑے رہے اور پولیس کو فون نہیں کیا، وہ کس چیز کا انتظار کررہے تھے؟ اسے اسی وقت گولی کیوں نہیں ماری گئی؟
بشریٰ انصاری نے ملزم ظاہر جعفر کے لیے کڑی سزا کا مطالبہ بھی کیا۔
اداکارہ ایمن خان نے لکھا کہ نور کو انصاف ضرور ملے گا اور ملزم ظاہر جعفر جہنم کی آگ میں جلے گا۔
پاکستان کی معروف اداکارہ صبا قمر نے نور کے لیے کی گئی انسٹاگرام پوسٹ میں لکھا کہ انسانیت کہاں ہے، ملک میں کسی خاتون کے ساتھ ہونے والا یہ پہلا واقعہ نہیں ہے۔
View this post on Instagram
انہوں نے لکھا کہ ہم کب تک ایسے سفاکانہ قتل کے واقعات کو نظر انداز کریں گے اور اپنے کاموں میں واپس لگ جائیں گے؟
خیال رہے کہ اسلام آباد پولیس نے 20 جولائی کی رات ملزم ظاہر کو ان کے گھر سے گرفتار کیا تھا جہاں نور کے والدین کے مطابق ملزم نے تیز دھار آلے سے قتل کیا اور سر جسم سے الگ کیا تھا۔
The post بشریٰ انصاری، صبا قمر بھی نور مقدم کیس پر بول پڑیں appeared first on .
