پیپلز پارٹی کی حکومت ترقیاتی کاموں کو ترجیح دے رہی ہے، مرتضٰی وہاب

سندھ حکومت کے ترجمان، مشیر قانون، ماحولیات و ساحلی ترقی بیرسٹر مرتضٰی وہاب نے کہا ہے کہ سندھ بھر میں پیپلز پارٹی کی حکومت ترقیاتی کاموں کو ترجیح دے رہی ہے۔

تفصیلات کے مطابق سندھ حکومت کے ترجمان مرتضٰی وہاب نے دو تلوار، تین تلوار، گزری، پنجاب چورنگی، برنس روڈ، سندھ سیکریٹیریٹ، صدر، پاکستان چوک، حقانی چوک اور ملحقہ علاقوں کا دورہ کیا ، جہاں انہوں نے جاری ترقیاتی کاموں اور صفائی ستھرائی کے انتظامات کا جائزہ لیا۔

اس موقع پر ڈپٹی کمشنر ضلع جنوبی ارشاد سوڈھر نے ترجمان سندھ حکومت بیرسٹر مرتضٰی وہاب کو بریفنگ دی۔

دورے کے دوران بیرسٹر مرتضٰی وہاب نے علاقوں میں صفائی ستھرائی کے انتظامات کو مزید بہتر کرنے کی ہدایت کی۔

 بیرسٹر مرتضٰی وہاب نے کہا کہ کراچی میں سڑکوں کی تعمیر، پارکس کی بحالی، نالوں کی مرمت، سیوریج کے نظام کی بہتری کے لیے کام جاری ہیں جبکہ نشیبی علاقوں میں ڈرینج سسٹم کی تعمیر کا کام بھی جاری ہے۔

سندھ حکومت کے ترجمان نے یہ بھی کہا کہ ہماری کوشش ہے کہ شہریوں کی سہولت کے لیے کاموں کو جلد مکمل کیا جائے۔

مرتضٰی وہاب کا کہنا تھا کہ پیپلز پارٹی کی سندھ حکومت کراچی میں ترقیاتی کاموں کو ترجیحی بنیادوں پر مکمل کروا رہی ہے جبکہ وفاقی حکومت نے اس شہر کو یکسر نظر انداز کردیا ہے۔

سندھ حکومت کے ترجمان، مشیر قانون، ماحولیات و ساحلی ترقی بیرسٹر مرتضٰی وہاب نے مزید کہا کہ کراچی کے شہریوں کو سبز باغ دکھائے ہیں اب عوام پی ٹی آئی کا اصل چہرہ پہچان چکے ہیں، شہری کسی بھی طرح ان کے جھانسے میں نہیں آئیں گے۔

The post پیپلز پارٹی کی حکومت ترقیاتی کاموں کو ترجیح دے رہی ہے، مرتضٰی وہاب appeared first on .