ڈائیلاگ کی ادائیگی کافی مشکل سے ہوتی تھی ،آمنہ الیاس کا انکشاف

مقبول ماڈل و اداکارہ آمنہ الیاس کا کہنا ہے کہ اداکاری کی شروعات میں ڈائیلاگز بولتے وقت گھبراہٹ کا شکار ہوجاتی تھی۔

تفصیلات کے مطابق آمنہ الیاس نے اپنے ایک انٹرویو میں اپنی فلموں میں اداکاری کے دوران پیش آنے والے چیلنجز سے متعلق گفتگو کی۔

اداکارہ نے بتایا کہ شروعات میں مجھے ڈائیلاگز تک بولنا نہیں آتے تھے، میرے منہ سے ڈائیلاگ کی ادائیگی بمشکل ہوتی تھی، مجھے کافی محنت کرنی پڑی، سمجھ نہیں آتا تھا کہ کہاں بولوں اور کہاں رکوں، اسکرپٹ کو کئی بار پڑھتی تھی جبکہ میں اب بھی کیمرے کا سامنا کرتے ہوئے گھبرا جاتی ہوں۔

انہوں نے کہا کہ فلموں میں اداکاری کے بعد لوگوں کے مثبت رسپانس سے اعتماد حاصل ہوا۔

آمنہ الیاس کا کہنا تھا کہ آج جس مقام پر ہوں وہ خوشی کا باعث ہے، انڈسٹری میں بہت زیادہ دھکے تو نہیں کھائے لیکن محنت بہت کی ہے۔

خیال رہے کہ آمنہ الیاس نے 2013 میں بننے والی فلم ‘زندہ بھاگ’ سے اداکاری کے کیرئیر کا آغاز کیا تھا، اس کے علاوہ وہ فلم ‘گڈ مارننگ کراچی’ میں بھی کام کرچکی ہیں۔

The post ڈائیلاگ کی ادائیگی کافی مشکل سے ہوتی تھی ،آمنہ الیاس کا انکشاف appeared first on .