حمزہ شہباز اور خورشید شاہ سے ٹیلی فونک رابطہ

حمزہ شہباز کا خورشید شاہ سے ٹیلی فونک رابطہ ہوا ہے۔

پنجاب اسمبلی میں اپوزیشن لیڈر حمزہ شہباز نے پیپلزپارٹی کے رہنما سید خورشید شاہ کو رہائی پر مبارک باد دی اورلاہور آنے کی بھی دعوت دی۔

ذرائع کے مطابق خورشید شاہ نومبر کے پہلے ہفتے میں شہبازشریف کی رہائش گاہ ماڈل ٹاؤن آئیں گے۔

حمزہ شہباز خورشید شاہ کو ظہرانہ دیں گے، دونوں رہنماؤں کے درمیان مرکز اور پنجاب میں ان ہاؤس تبدیلی کے حوالے سے مشاورت بھی ہوگی۔

حمزہ شہبا ز نے کہاکہ آپ کی جمہوریت کےلئے قربانیوں کو ہمیشہ یاد رکھا جائےگا، موجودہ حکومت نے انتقام کی سیاست کی اور ملک کی طرف توجہ نہیں دی۔

ان کا کہنا تھا کہ عمران خان ملک اور عوام کےلئے کینسر بن گئے ہیں۔

پی پی رہنما خورشید شاہ نے کہاکہ موجودہ حکومت سے نجات کا واحد آئینی راستہ ان ہاؤس تبدیلی میں ہے، میں نے جو فارمولا دیا ہے اس پر عملدرآمد کے لیے اپنے پارٹی قائد کو قائل کریں۔

ذرائع کے مطابق خورشید شاہ نے حمزہ شہباز کو ٹیلی فون کرنے پر شکریہ ادا کیا۔

اس سے قبل مسلم لیگ ن کے قائد نواز شریف نے بھی خورشید شاہ سے ٹیلی فونک رابطہ کیا تھا۔

 سابق وزیراعظم نواز شریف نے خورشید شاہ کو ضمانت پر رہائی پر مبارکباد دی تھی۔

 دونوں رہنماؤں کے درمیان موجودہ ملکی سیاسی صورتحال اور باہمی دلچسپی  کے امور پر بھی تبادلہ خیال کرتے ہوئے موجودہ معاشی صورتحال پر تشویش کا اظہار بھی کیا۔

 مسلم لیگ ن کے قائد اور خورشید شاہ کا پارلیمنٹ کے اندر مشترکہ لائحہ عمل تیار کرنے پراتفاق ہوا۔

اس موقع پر پیپلز پارٹی کے رہنما خورشید شاہ نے کہاکہ ملک کے موجودہ حالات کا تقاضا ہے کہ اپوزیشن جماعتیں متحد ہوں، ماضی کو بھلا کر سلیکٹڈ حکومت سے عوام کی جان چھڑائی جائے۔

 اپوزیشن جماعتوں کے درمیان اتفاق رائے کے لیے خورشید شاہ نے کردار ادا کرنے کی پیشکش بھی کی۔

ذرائع کے مطابق ٹیلی فونک رابطے کے دوران قائد مسلم لیگ ن نے کہاکہ دو سال تک آپ کو پابند سلاسل رکھ کر سیاسی انتقام کا نشانہ بنایا گیا، حکومت کا سارا زور عوام کو ریلیف دینے کے بجائے اپوزیشن رہنماؤں پر جھوٹے مقدمات بنانے پر لگا رہا۔

 سید خورشید شاہ نے مسلم لیگ ن کے قائد کا رہائی پر مبارکباد دینے پر شکریہ ادا کیا۔

The post حمزہ شہباز اور خورشید شاہ سے ٹیلی فونک رابطہ appeared first on .