اومیکرون سے نمٹنے کیلئے سندھ حکومت کی ہنگامی بنیادوں پر اقدامات کی ہدایت

کراچی: کورونا کے نئے خطرناک ویرئینٹ اومیکرون سے نمٹنے کے لیے سندھ حکومت نے ہنگامی بنیادوں پر اقدامات کی ہدایت کرتے ہوئے تیار رہنے کا حکم جاری کردیا۔

محکمہ داخلہ سندھ نے کی جانب سے جاری احکامات میں کہا گیا ہے کہ کورونا کے نئے جنوبی افریقی ویرئینٹ سے بچاو کے لیے ہنگامی بنیاد پر اقدامات شروع کیے جائیں، اور اس کے پھیلاو کو روکنے کے لیے ہر ممکن اقدامات کئے جائیں۔

محکمہ داخلہ سندھ نے خطرناک اومیکرون وائرس کو روکنے کے لیے 10 دن میں تمام انتظامات مکمل کرنے کا حکم جاری کردیا۔

یہ بھی پڑھیں: محکمہ داخلہ سندھ کا کورونا ایس او پیز کے حوالے سے نیا حکم نامہ جاری

چیف سیکریٹری سندھ نے ضلعی انتظامیہ اور محکمہ صحت کو اومیکورن سے بچاو اور پھیلاو کے سخت انتظامات و اقدامات کا حکم دیتے ہوئے عوام کو پابندی کرانے کا ٹاسک ضلعی انتظامیہ اور محکمہ صحت سندھ کے حوالے کردیا۔

چیف سیکریٹری سندھ ممتاز علی شاہ نے حکم دیا کہ کورونا ایس او پیز کی خلاف ورزی کرنے والوں کے ساتھ سختی سے نمٹا جائے۔

ساتھ ہی کورونا کے پھیلاو کو روکنے کے لیے ویکسنیشن کا عمل دوبارہ ہنگامی بنیادوں پر تیز کرنے کا بھی حکم جاری کیا گیا ہے۔

اومیکورن وائرس کے خلاف اقدامات کی رپورٹ یومیہ بنیادوں پر چیف سیکریٹری سندھ کو جمع کرانے کا حکم بھی دیا گیا ہے۔

محکمہ داخلہ سندھ کے اعلامیے میں کہا گیا ہے کہ جنوبی افریقہ، یورپ سمیت دیگر ملکوں سے کورونا کا نیا ویریئنٹ اومیکرون وائرس پاکستان سمیت صوبہ سندھ میں پھیل سکتا ہے، اس کو روکنے کیلئے احتیاطی تدابیر اختیار کی جائیں۔

اومیکرون وائرس سے متعلق حفاظتی انتظامات کے تحت ہائی رسک اور سی کٹیگری ملکوں سے کراچی ایئرپورٹ آنے والے مسافروں پر سندھ حکومت نے سختی کرنے کا حکم جاری کرتے ہوئے محکمہ صحت کے ایئرپورٹ پر تعینات عملے کو مسافروں کے ریپڈ کورونا وائرس ٹیسٹ کا عمل سخت کرنے کی ہدایت کردی۔

The post اومیکرون سے نمٹنے کیلئے سندھ حکومت کی ہنگامی بنیادوں پر اقدامات کی ہدایت appeared first on .